62 yoshli otaxonning mashinasi uyi oldidan olib qochildi

Buxoro shahrida “VAZ 21011” rusumli avtomashina olib qochilganidan so‘ng davlat raqam belgilari yechib olingan holatda Shayx ul-Olam ko‘chasidan topilgan, deya ma’lum qildi IIV huzuridagi Tergov departamenti.

Aniqlanishicha, 2019 yil 13 noyabr kuni taxminan soat 10:00 da Buxoro shahar I.Mo‘min ko‘chasi, 28-uy oldida fuqaro I.G. tomonidan qarovsiz qoldirilgan “VAZ 21011” rusumli avtomashina 28 yoshli A.Sh. tomonidan olib qochilgan.

Olib borilgan tezkor qidiruv tadbirlari natijasida ushbu avtomashina Buxoro shahar Shayx ul-Olam ko‘chasida, oldi va orqa davlat raqam belgilari yechib olingan holatda topilgan.

Hodisa sodir bo‘lgan joyni ko‘zdan kechirish jarayonida avtomashinaning oldi davlat raqam belgisi Zulfiya ko‘chasi yo‘l yoqasidan topilib, tegishli tartibda hujjatlashtirilgan.

Mazkur holat yuzasidan 2019 yil 13 noyabr kuni Buxoro shahar IIO FMB huzuridagi tergov bo‘limi tomonidan A.Sh.ga nisbatan O‘zbekiston Respublikasi Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilib, dastlabki tergov harakatlari olib borilmoqda.