“Dinamo” safarda “Neftchi”ni mag‘lub etdi

Bugun Pro-Liganing 19-turidan o‘rin olgan o‘yinda viloyatimizning “Dinamo” va Farg‘onaning “Neftchi” jamoalari bahslashdi. Birinchi bo‘limda vakillarimiz qarshi hujumdan ko‘proq foydalanishdi.

O‘yinning 31-daqiqasida Oybek Nurmatovning xavfli zarbasini raqib darvozaboni qiyinchilik bilan qaytardi. 33-daqiqada esa Amirjon Safarov Shoxruh Abdurahmonov uzatmasidan foydalana olmadi. 44-daqiqaga kelib farg‘onaliklarlar hisobni ochishdi. Biroq darvozabonimizga qilingan qo‘pollik evaziga kiritilgan gol hisoblanmadi va futbolchilar 0:0 hisobida tanaffusga yo‘l olishdi.

Ikkinchi bo‘limda ham jamoalarda xavfli vaziyatlar ko‘p bo‘ldi. Afsuski, mezbonlar foydalana olishmadi. Futbolchilarimiz esa faollik bilan harakatlanishdi. O‘yinning 78-daqiqasida Avaz Agaliyevning burchakdan yetkazgan to‘pini Muhammadqodir Hamraliyev golga aylantirdi hamda “Dinamo” jamoasini oldinga olib chiqdi. O‘yinda boshqa gol urilmadi va samarqandliklar turnir jadvalida uchinchi o‘ringa ko‘tarilib oldi.

Qayd etish lozimki, Pro-Liganing 16-turida ham “Dinamo” jamoasi “Neftchi”ni 2:0 hisobida mag‘lub etgandi.

Fazliddin RO‘ZIBOYeV.