DXX rahbari yoshlarni eshitdi
Davlat xavfsizlik xizmati Samarqand viloyati boshqarmasi boshlig‘i A.Axmedovning navbatdagi “Rahbar va yoshlar” uchrashuvi Jomboy va Bulung‘ur tumanlarida o‘tkazildi.
Tumanlardagi sektor rahbarlari va mutasaddi tashkilotlar mas’ullari ishtirokida o‘tkazilgan uchrashuvlarda dastlab boshqarma boshlig‘i O‘zbekiston Respublikasi konstitutsiyaviy qonuni bo‘yicha 30 aprel kuni o‘tkaziladigan referendum va uning mohiyati haqida yoshlarga tushuncha berdi.
Yangilanayotgan konstitutsiyada aks etgan yoshlar hayoti, ta’lim-tarbiyasiga oid me’yorlar to‘g‘risida so‘z yuritildi.
Jomboylik yigit-qizlarning tadbirkorlik, ishga joylashish, bankdan kredit olish, sport bilan shug‘ullanish uchun sharoit yaratish, kitobxonlik va kompyuter savodxonligi masalalari yuzasidan murojaatlari eshitildi. Har bir muammo, masalani ijobiy hal etish chora-tadbirlari belgilanib, mas’ullar biriktirildi.
Xususan, tumanning G‘uzor mahallasida yashovchi L.Omonov yoshlar uchun maxsus sport maydonchasi qurish, Shodlik mahallasi yoshlar yetakchisi N.G‘afforova yaqinda qurib foydalanishga topshirilgan yangi kutubxonaga yangi badiiy asarlar olish yuzasidan murojaat qildi. Ushbu masalalarga tez kunlarda yechim topilishi ma’lum qilindi.
Bulung‘urlik 250 nafardan ortiq yoshlar qatnashgan uchrashuvda ham yigit-qizlarning o‘nlab muammo va takliflari eshitilib, ularga tezkor yechim topish chora-tadbirlari belgilandi.
Jumladan, viloyatdagi 1126 mahallada faoliyat ko‘rsatayotgan yoshlar yetakchilarini jalb etgan holda DXX viloyat boshqarmasi kubogi uchun “Zakovat” intellektual o‘yinini o‘tkazish taklifi bildirildi va bu tashabbus qo‘llab-quvvatlandi.
