IIV fuqarolarni soxta xabarlardan ogohlantirdi
So‘nggi paytlarda fuqarolarimiz tomonidan pornografik foto va video mahsulotlarni targ‘ib qiluvchi internet resurslaridan foydalanish jarayonida boshqa shu kabi resurslarga avtomatik tarzda o‘tib ketish orqali “O‘zbekiston Respublikasi IIV Kiberjinoyatlarga qarshi kurash bo‘limidan bildirishnoma” sarlavhasi ostida sizib chiquvchi, oynada foydalanuvchining taqiqlangan saytlarga kirgani sababli go‘yoki, IIV tomonidan u 200 000 so‘m (ayrim hollarda 300 000 so‘m) miqdorida jarimaga tortilgani haqida xabarlar tarqalmoqda.
Shuningdek, “Webmoney” elektron to‘lov tizimi orqali davlat hisobiga to‘lov amalga oshirilishi lozimligi, aks holda qurilmada saqlangan kontaktlarga foydalanuvchining pornografik foto va video mahsulotlar joylashtirilgan internet resurslaridan foydalangani haqida hodisa bayoni hamda foydalanuvchiga jarimani to‘lashi talabi bilan SMS xabar yuborilishi haqida ma’lumot paydo bo‘lmoqda.
Shu bilan birga, foydalanuvchilarning internet veb-brauzeri blokirovka holatiga tushib qolmoqda.
Ta’kidlab o‘tilgan holatlar yuzasidan quyidagilarni ma’lum qilamiz:
– O‘zbekiston Respublikasi Ichki ishlar vazirligi tarkibida “Kiberjinoyatlarga qarshi kurash bo‘limi” nomi bilan faoliyat yurituvchi bo‘lim yoki bo‘linma mavjud emas;
– “Webmoney” to‘lov tizimida O‘zbekiston Respublikasi IIV tarkibiy va hududiy tuzilmalari elektron hamyonlariga ega emas.
Shunga muvofiq O‘zbekiston Respublikasi Ichki ishlar vazirligi fuqarolarni internet tarmog‘idan foydalanayotganda bu kabi salbiy holatlarga duch kelmaslik uchun firibgarlarning aldoviga ishonib qolmaslikka chaqirgan.
Bugungi kunda yuqorida ta’kidlab o‘tilgan holatlar yuzasidan surishtiruv ishlari olib borilayotganligini ma’lum qilamiz.
