Muftiy Usmonxon Alimovga birinchi o‘rinbosar tayinlandi
Bugun, 17 dekabr kuni O‘zbekiston Musulmonlari idorasi Oliy hay’atining navbatdagi kengaytirilgan yig‘ilishi bo‘lib o‘tdi. Unda Oliy hay’at a’zolari, diniy idora rahbariyati, bo‘lim boshliqlari, taniqli imom-xatiblar ishtirok etdi. Bu haqda Musulmonlari idorasi matbuot xizmati xabar bermoqda.
Yig‘ilish Qur’oni karim tilovati bilan boshlandi va tashkiliy masala ko‘rildi. Unga ko‘ra, O‘zbekiston Musulmonlari idorasi tuzilmasida yangi joriy etilgan raisning birinchi o‘rinbosari lavozimiga Ishmatbekov Homidjon Bahromovich nomzodi bir ovozdan ma’qullandi.
Ma’lumot o‘rnida, Homidjon Ishmatbekov 1970 yil Toshkent shahrida tug‘ilgan. Toshkent islom instituti, Madina islom universitetida tahsil olgan. Faoliyati davomida “Ko‘kaldosh” o‘rta maxsus islom bilim yurti mudiri, Toshkent shahar “Muhammad Nosir hoji” masjidi imom-xatibi, O‘zbekiston Musulmonlari idorasi Fatvo bo‘limi mudiri lavozimlarida xizmat qilgan. Bir qator kitob va ilmiy maqolalar muallifidir.
