Payariqlik mohir rahbar, mehnat faxriysi O‘roqxon Jamolov vafot etdi
Uzoq yillar rahbarlik va qishloq xo‘jaligi sohasida ishlab, fidoyilik ko‘rsatgan inson, mehnat faxriysi O‘roqxon Jamolov 1 may kuni 91 yoshida vafot etdi.
O‘roqxon Jamolov 1930 yil 9 may kuni Payariq tumani To‘polos qishlog‘ida tug‘ildi.
O‘rta maktabda tahsil olgach, avval Samarqand moliya texnikumini, so‘ngra Toshkent xalq xo‘jaligi institutini buxgalter-iqtisodchi mutaxassisligi bo‘yicha tamomladi.
1953 yilda ilk ish faoliyatini Qashqadaryo viloyati Miroqi tumanida Xalq banki bosh hisobchisi lavozimidan boshladi. U yerda to‘rt yil ishlab, o‘zi tug‘ilib o‘sgan Payariq tumaniga keldi va 1966 yilgacha tuman partiya qo‘mitasida bo‘lim boshlig‘i, raykomning ikkinchi sekretari bo‘lib faoliyat yuritdi. Bu yillar davomida halol mehnati bilan elda obro‘ orttirdi, o‘z davrining mohir va tajribali rahbari sifatida tanildi.
O‘.Jamolov 1966-1973 yillarda Xatirchi tumani raykomi birinchi sekretari, so‘ngra Payariq tumanidagi Payariq sovxozi direktori bo‘lib ishlagan paytida aholini qiynab kelayotgan muammolarni baholi qudrat hal qildi, odamlarning yaxshi turmush kechirishi uchun zarur sharoitlarni yaratdi. Samarqand viloyat o‘rmon xo‘jaligi boshlig‘i bo‘lib ishlagan paytlarida ham bunday ezgu ishlarini amalga oshirishni kanda qilmadi.
O‘roqxon Jamolov nafaqaga chiqqach ham bekor o‘tirmadi. O‘n yil davomida Samarqand shahar “Bog‘i Temur” mahalla fuqarolar yig‘ini raisi vazifasida faoliyat yuritdi.
Xalqqa qilgan xizmatlari tufayli "Hurmat belgisi", "Mehnat shuhrati" ordenlari, O‘zbekiston Respublikasi mustaqilligining 10, 15, 20 yilligi esdalik nishonlari bilan taqdirlandi, “O‘zbekistonda xizmat ko‘rsatgan qishloq xo‘jaligi xodimi” unvoniga sazovor bo‘ldi. 6 o‘g‘il, 1 qizni oqil, tarbiyali etib voyaga yetkazdi.
Ajoyib inson, mohir rahbar O‘roqxon Jamolovning yorqin xotirasi keng jamoatchilik, farzandlari va do‘stlari qalbida abadiy yashaydi.
Nuroniylar jamoatchilik kengashi viloyat bo‘limi.
