Prezident maktablariga qancha o‘quvchi qabul qilinadi?

- Prezident maktablariga 2021-2022 o‘quv yilida qancha o‘quvchi qabul qilish rejalashtirilgan?

- Joriy o‘quv yilida respublika bo‘yicha jami 1632 nafar, shu jumladan, Toshkent shahri, Namangan viloyati, Qoraqalpog‘iston Respublikasi, Xorazm viloyatidagi Prezident maktablarida 5-sinf uchun 24 nafar, 6-sinf uchun 24 nafardan jami 192 nafar, yangidan tashkil qilinayotgan Andijon, Buxoro, Qashqadaryo, Surxondaryo, Sirdaryo, Jizzax, Navoiy, Farg‘ona, Toshkent, Samarqand viloyatlaridagi Prezident maktablariga 5-sinfdan 10-sinfgacha o‘quvchilar har bir sinfda 24 nafardan jami 1440 nafar o‘quvchi qabul qilinishi rejalashtirilgan. Jumladan, Samarqand viloyatida 5-10-sinf uchun 144 nafar o‘quvchi qabul qilinadi.

- Prezident maktablarida imtihon jarayonlari qaysi tilda bo‘ladi?

- Prezident maktablarida kirish imtihonlari talabgorlarning xohishiga ko‘ra o‘zbek, ingliz yoki qoraqalpoq tilida bo‘ladi.

- Prezident maktablarida o‘quvchilar boshqa maktablardagi kabi davlat ta’lim standarti asosida o‘qitiladimi?

- Vazirlar Mahkamasining 2019 yil 25 iyundagi 526-son qarori bilan tasdiqlangan “Prezident maktablari to‘g‘risidagi Nizom”ning 4-bob, 14-bandiga muvofiq, Prezident maktablarida ta’lim jarayoni umumiy o‘rta ta’limning davlat ta’lim standartlari hisobga olingan holda, Kembridj universitetining Cambridge Assessment tashkiloti bilan hamkorlikda ishlab chiqilgan hamda Prezident, ijod va ixtisoslashtirilgan maktablarni rivojlantirish agentligi tomonidan tasdiqlanadigan o‘quv rejalari va dasturlariga muvofiq amalga oshiriladi.

- Prezident maktabi o‘quvchilari yotoqxona bilan ta’minlanadimi?

- Prezident maktablarida o‘quvchilarning barchasi yotoqxona bilan ta’minlanadi, o‘quvchilar haftaning dushanbadan juma kunigacha maktab hududida qolib ta’lim olishadi.

- Prezident maktablariga kirish uchun qanday hujjatlar talab etiladi?

- Prezident maktablariga kirish uchun talab etiladigan hujjatlar quyidagilar:

* tug‘ilganlik to‘g‘risida guvohnoma nusxasi;

* belgilangan shakldagi ma’lumotnoma (talabgor o‘qiyotgan maktab direktori tomonidan tasdiqlangan nusxasi);

* 3x4 o‘lchamdagi rasm (oxirgi 2 oy davomida tushirilgan);

* baholar tabelining nusxasi (2020/2021 o‘quv yili natijasiga ko‘ra, maktab direktori tomonidan tasdiqlangan);

* talabgor hamda uning ota-onasi yoki ularning o‘rnini bosuvchi shaxslar fuqarolik pasporti ma’lumotlari (telefon raqami, elektron pochta manzili).

- Prezident maktablariga hujjat topshirganda qanday holatlarda rad etilishi mumkin?

- Prezident maktablariga topshirilgan hujjatlar rad etiladi, qachonki talabgor...

* belgilangan muddatlardan keyin saralash tanlovida ishtirok etish xohishini bildirsa;

* o‘quv yili natijasiga ko‘ra mazkur tartibda ko‘rsatilgan fanlarni a’lo baholarga tugatmagan bo‘lsa;

* ta’lim olayotgan maktabning hududiy mansubligi Prezident maktabining hududiy mansubligiga mos kelmaganda;

* hujjatlar to‘liq taqdim etilmaganda;

* taqdim etilgan hujjatlarni yozuvlar, muhrdagi yozuvlar sifatsiz holda nusxalangan bo‘lsa;

* chet el fuqarosi bo‘lsa;

* umumta’lim muassasalarining tegishli sinflarida o‘qishni to‘liq tamomlagan va Prezident maktabida xuddi shunday sinfida takroran o‘qish istagida bo‘lsa.

- Prezident maktablariga hujjat topshirish uchun qanday talablar mavjud?

- Prezident maktablariga hujjatlarni topshirish uchun nomzodlarga qo‘yiladigan talablar quyidagicha:

• A’lo baholar. Prezident maktablariga hujjatlarni topshirish uchun talabgorlar jadvalda keltirilgan STEAM fanlaridan 2020-2021 o‘quv yilini a’lo baholarga tugatgan bo‘lishi shart.

• Hududiy mansublik. Talabgor o‘qiyotgan maktab Prezident maktabi joylashgan hududga mansub bo‘lishi lozim.
• O‘quv jarayoni. STEAM matematika, fizika, kimyo, biologiya va kompyuter ta’limi ingliz tilida olib boriladi.
• Maktab-Internat. Talabgor Prezident maktabiga qabul qilingan taqdirda, uning ota-onasi (qonuniy vakillari) o‘quvchining Prezident maktablarida 5 kun davomida internat shaklida ta’lim olishiga rozilik bildirishi talab etiladi.

Savollarga Davlat test markazi Samarqand viloyat bo‘limi boshlig‘i Vohid Sirliboyev javob berdi.