Qashqadaryolik talaba Osiyoning yangi rekordini o‘rnatdi
Buyuk Britaniya poytaxti London shahrida para-suzish bo‘yicha navbatdagi jahon chempionati bo‘lib o‘tmoqda. Bu haqda oliy va o‘rta maxsus ta’lim vazirligi xabar berdi.
Joriy yilning 15 sentyabr kungi bahslarida qatnashgan Qarshi davlat universiteti jismoniy madaniyat fakultetining 4-kurs talabasi Shohsanam Toshpo‘latova ayollar o‘rtasida 100 metrga batterflyay usulida suzishda finishga birinchi bo‘lib yetib keldi va terma jamoa hisobiga ilk oltin medalni olib berdi.
Shohsanam 1 daqiqa, 3,89 soniya natija bilan Osiyo rekordini yangiladi. Shohsanam bungacha 100 metrga erkin usulda suzish bo‘yicha bronza medaliga sazovor bo‘lgan edi.
