Senator murojaatchilar bilan uchrashdi va masalalar hal etildi
Oliy Majlis Senatida doimiy asosda ishlovchi senatorlar shu kunlarda hududlarda bo‘lib, mahalliy Kengashlar deputatlari, aholi bilan uchrashuvlar o‘tkazmoqda.
Ayni paytda Samarqandda bo‘lib turgan Senatning yoshlar, madaniyat va sport masalalari qo‘mitasi raisi Baxtiyor Sayfullayev bugun Past Darg‘om tumanida bo‘ldi.
Xalq deputatlari Past Darg‘om tumani kengashi kotibiyati va doimiy komissiyalar raislari bilan muloqot davomida senator parlament yuqori palatasining yaqinda o‘tkazilgan o‘n ikkinchi yalpi majlisida muhokama etilgan masalalar haqida ma’lumot berdi. Davlatimiz rahbarining Oliy Majlisga Murojaatnomasi hamda “Yoshlarni qo‘llab-quvvatlash va aholi salomatligini mustahkamlash yili” Davlat dasturida belgilangan vazifalarni amalga oshirishda mahalliy Kengashlarning o‘rni, amalga oshiriladigan ishlar haqida so‘z yuritildi.
Shundan so‘ng B.Sayfullayev pastdarg‘omlik fuqarolarning Oliy Majlis Senatiga yo‘llagan murojaatlarini joyiga borib o‘rgandi. Jumladan, tumanning O‘rta Charxin mahallasida yashovchi tadbirkorlar B.Shokirov va S.Shokirovlarning bank bilan bog‘liq murojaati tomonlar ishtirokida muhokama qilinib, muammoga ijobiy yechim topildi. Shuningdek, Olti qahramon mahallasida istiqomat qiluvchi E.Parmonovning arizasi keng jamoatchilik bilan birga ko‘rib chiqildi.
