Shavvol oyining ro‘zasi qachon va qanday tutiladi?

«Shavvol oyining ro‘zasini qachondan boshlab tutish kerak? Uning hukmi qanday hamda saharlik va iftorlik qachon qilinadi?».

Bugungi kunda ko‘pchilik mana shunday savollarga javob izlayapti.

Savbon roziyallohu anhudan rivoyat qilinadi: Rasululloh sollallohu alayhi vasallam: “Ramazon ro‘zasi o‘n oy ro‘zaga to‘g‘ri kelsa, Shavvolning olti kuni ikki oyga to‘g‘ri keladi, natijada bu bir yil ro‘za bo‘ladi”, dedilar. Boshqa rivoyatda: “Kim fitrdan keyin olti kun ro‘za tutsa, bir yil to‘la ro‘za bo‘ladi”, deb zikr qilingan (Imom Ahmad va Ibn Moja rivoyati).

Shavvol oyining ro‘zasini Shavvol oyi mobaynida istalgan kunlarda tutishingiz mumkin, biroq solih amallarning yaxshisi tezroq bajariladiganlaridir. Shuning uchun Hayitning 3-kunidan boshlab tutish mumkin. Hayitning ertasidan tutsa ham bo‘ladi. Mazkur kunlardagi ro‘zani Shavvol oyining xoh avvalida, xoh o‘rtasida xoh oxirida uzluksiz tutish mumkin. Yoki Shavvol oyi davomida kun oralatib tutish ham durustdir.

Biror kishida Ramazon ro‘zasining qazosi bo‘lsa, avval qazo ro‘za tutiladi. Chunki Ramazon ro‘zasi farz. Shavvol oyi ro‘zasining hukmi — nafl.

Saharlik bomdod vaqtining kirish vaqtidir. Iftorni esa shom namozi vaqti kirishi bilan qilinadi.