Test sinovlari: Samarqandda 6 kunda 27 nafar abituriyent imtihondan chetlatildi

Ayni kunda 2023-2024 o‘quv yili uchun oliy ta’lim muassasalariga kirish test sinovlari davom etmoqda.

Bu yilgi test sinovlariga Samarqand viloyatida jami 7 ta bino tanlangan bo‘lib, 91 475 nafar abituriyent imtihonda qatnashish uchun hujjat topshirgan.

Bilim va malakalarni baholash agentligi viloyat bo‘limi ma’lumotiga ko‘ra, 7 avgust kuniga qadar test sinovlariga 40 755 nafar abituriyent qatnashgan bo‘lsa, 3165 nafar abituriyent turli sabablarga ko‘ra test sinovlariga kelmagan.

Shuningdek, binoga kirishda 3 nafar, test jarayonida 24 nafar, jami 27 nafar abituriyent imtihon qoidalariga rioya etmagani uchun sinovlardan chetlatilgan.

Eslatib o‘tamiz: Samarqandda test sinovlari 13 avgustgacha (shu kuni ham) davom etadi.