Фарзандингиз айни дамда кўпроқ вақтини нималарга сарфлаяпти?

Шу савол билан телеграм каналимиз орқали мухлисларимиз орасида сўровнома ўтказгандик. Унда 759 киши иштирок этиб, 416 нафари, яъни 55 фоизи “Онлайн дарсларда иштирок этиб, кўпроқ ўқиш билан банд” деган жавобни танлаган.

Иштирокчиларнинг 139 нафари “Кўп вақтини уй юмушларига қарашиш, томорқада ишлаш билан ўтказяпти”, 174 нафари ёки 23 фоизи “Вақтини телевизорда кино ва кўрсатувлар томоша қилишга сарфлаяпти” деган жавобни белгилаган. Сўровномада қатнашган мухлислар орасида "Уйда қолинг!" шиорига амал қилмаяпти. Вақтини кўчада ўтказяпти”, деган жавобни танлаганлар 4 фоизни, яъни 30 нафарни ташкил этган.

Кўриниб турибдики, иштирокчиларнинг аксарияти фарзандининг билим олиш, кўпроқ китоб ўқиш билан бандлигини маълум қилган. Аммо кам бўлса-да ота-оналар орасида фарзандларининг айни карантин даврида уйда қолиб, вақтини мазмунли ташкил этиш ўрнига кўчада юришларини билдирганлар ҳам бор. Хўш, нега болалар карантин пайтида кўчага чиқмоқда. Тўғри, 14 ёшгача бўлган болалар ота-оналари ҳамроҳлигида, ўсмир ёшлар эркин ҳолда уй атрофида сайр қилишларига рухсат берилди. Аммо бу соатлаб кўчада бемақсад юриш дегани эмас. Қолаверса, 10-14 ёшли болалар ота-оналари ҳамроҳлигисиз юрганларига нима дейсиз?

Хўш, бунинг сабаби нимада? Кўпчиликни ўйлантирадиган савол бу. Айниқса, бугунги карантин кунларида сабабсиз кўчада юрган ўсмир-ёшларнинг бу ишини оқлаб бўладими? Турли ҳуқуқбузарликларни ҳам айнан вақтини мазмунли сарфламайдиганлар содир этаётгани сир эмас-ку. Шунинг учун фарзандларимизга эътиборли бўлайлик, уларни китобга ошно қилайлик, тўғри йўл кўрсатайлик. Шунда кўзлаган эзгу мақсадларимизга эришишимиз мумкин. Шуни унутмайлик!

Тўлқин Сиддиқов.