Андроид қурилмалар учун Zarnews.uz мобил иловаси. Юклаб олиш x

Рақамли технология – яширин иқтисодиёт, коррупцияга барҳам беради

Самарқанд вилояти давлат солиқ бошқармасида тадбиркорлар ва ҳисобчилар учун электрон ҳисобварақ-фактуралар орқали ҳужжат айланиш тизими ва онлайн назорат-касса машинаси, виртуал кассадан фойдаланишга бағишланган ўқув-семинар ташкил этилди.

Тадбирда Ўзбекистон Республикаси Давлат солиқ қўмитаси ҳузуридаги “Янги технологиялар” илмий-ахборот маркази масъул ходимлари иштирок этди.

Семинарда электрон ҳисобварақ-фактуралар орқали ҳужжат айланиши ва онлайн назорат-касса машинаси, виртуал кассадан фойдаланиш амалий тарзда кўрсатиб берилди. Рақамли технологиялардан фойдаланиш ҳеч қандай бюрократик тўсиққа ўрин қолдирмаслиги, аксинча, яширин иқтисодиётга барҳам бериши ва коррупциянинг олдини олишда муҳим ўрин тутиши алоҳида қайд этилди.

Таъкидлаш лозимки, жорий йил 1 апрелдан бошлаб барча турдаги бухгалтерлик ҳисоб-китобларининг электрон ҳисобварақ-фактуралар орқали амалга оширилиши, 1 июлдан бошлаб эса хўжалик юритувчи субъектларнинг бу жараёнда қатнашмаслиги солиқ идоралари томонидан жаримага тортилишига сабаб бўлиши ҳақида маълумот берилди.

– Семинардан кўзланган асосий мақсад тадбиркорлик субъектлари вакилларига электрон ҳисобварақ-фактуралар ва онлайн назорат-касса машинаси, виртуал кассанинг қулайликлари ҳамда афзалликлари, улардан фойдаланиш тартиби хусусида атрофлича тушунча беришдан иборат, – дейди Давлат солиқ қўмитаси ҳузуридаги “Янги технологиялар” илмий-ахборот маркази масъул ходими Нодир Муҳаммадов. – Электрон ҳисобварақ-фактуралардан фойдаланиш қоғоз ва йўл кира харажатларининг қисқаришига, вақтни тежашга замин яратади. Шунингдек, маълумотларни операторлар беш йил, роуминг операторлари эса ўн йил давомида сақлаши тизимнинг яна бир қулайлигидан далолат беради. Бу эса маълумотлар хавфсизлигини таъминлашда муҳим аҳамият касб этади.  

   Электрон ҳисобварақ-фактуралар ҳамда онлайн-назорат касса машинаси ёки виртуал кассалар тизимидан кўзлаган мақсад – ҳар бир ишда солиқ тўловчиларга енгиллик яратиш, тадбиркорларга яқин кўмакчи бўлиш ҳисобланади. Рақамли иқтисодиётнинг амалга жорий этилиши бизнес жараёнлари шаффофлигига, тадбиркорлар ўртасида барқарор соғлом рақобатга эришишни таъминлайди.

Даврон РАВШАНОВ,

Самарқанд вилояти давлат солиқ бошқармаси ахборот хизмати раҳбари.