Алишер Навоий ғазаллари ва “Навоий гулшани” АҚШда чоп этилди

Яқинда Алишер Навоий ғазаллари ва шоира Турсуной Содиқованинг “Навоий гулшани” рисоласи жамланган “Without You” (“Сенсиз”) номли китоб АҚШдаги Аризона штатидаги “Jasmaya Productions and Publications” нашриётида чоп этилди.

Китобни шоир ва таржимон Аъзам Обид таржима қилиб, нашрга тайёрлади. Америкалик ижодкор Эбигейл Бриттон муҳаррирлик қилди.

“Without You” Навоийнинг 14 та жуда чиройли ғазали ҳамда Турсуной Содиқованинг қатор бошқа ғазалларга шарҳларини ўз ичига олади. Ажойиб рассомларимиз Шавкат Музаффар ва Ҳусан Содиқов ғоят гўзал ишлари билан китобни безаш орқали ушбу лойиҳада иштирок этди.

- Биз Навоийни нафақат инглиз дунёсига, балки ер юзининг миллионлаб бошқа халқларига ҳам таништиришимиз керак. Афсуски, бу борада жуда кам иш қилганмиз. Истагим шуки, Алишер Навоий номини кўтариб юрган ва бошқа барча масъул муассасалар, катта-кичик даргоҳлар ижоддан тўхтамасин ва жиддийроқ халқаро лойиҳалар билан ҳам шуғуллансин,- дея таъкидлади Аъзам Обид.