Alisher Navoiy g‘azallari va “Navoiy gulshani” AQShda chop etildi

Yaqinda Alisher Navoiy g‘azallari va shoira Tursunoy Sodiqovaning “Navoiy gulshani” risolasi jamlangan “Without You” (“Sensiz”) nomli kitob AQShdagi Arizona shtatidagi “Jasmaya Productions and Publications” nashriyotida chop etildi.

Kitobni shoir va tarjimon A’zam Obid tarjima qilib, nashrga tayyorladi. Amerikalik ijodkor Ebigeyl Britton muharrirlik qildi.

“Without You” Navoiyning 14 ta juda chiroyli g‘azali hamda Tursunoy Sodiqovaning qator boshqa g‘azallarga sharhlarini o‘z ichiga oladi. Ajoyib rassomlarimiz Shavkat Muzaffar va Husan Sodiqov g‘oyat go‘zal ishlari bilan kitobni bezash orqali ushbu loyihada ishtirok etdi.

- Biz Navoiyni nafaqat ingliz dunyosiga, balki yer yuzining millionlab boshqa xalqlariga ham tanishtirishimiz kerak. Afsuski, bu borada juda kam ish qilganmiz. Istagim shuki, Alisher Navoiy nomini ko‘tarib yurgan va boshqa barcha mas’ul muassasalar, katta-kichik dargohlar ijoddan to‘xtamasin va jiddiyroq xalqaro loyihalar bilan ham shug‘ullansin,- deya ta’kidladi A’zam Obid.