Булунғурда ҳисобчи ҳамкасбининг банк картасидаги пулларни ўзлаштирган

Булунғур туманида яшовчи фуқаро Р.Ж. ИИБга ариза билан мурожаат қилиб, номаълум шахслар банк картасида мавжуд бўлган жами 1.040.000 сўм миқдордаги пулларини ечиб олинганлигини билдирган.

Тезкор-қидирув тадбирлари натижасида ушбу жиноятни Р.Ж.нинг  ҳисобчи бўлиб ишловчи ҳамкасби, 1990 й.т., С.Ч. содир этганлиги аниқланди.

С.Ч. ўз ваколатларидан фойдаланиб, унда мавжуд бўлган Р.Ж.нинг банк картаси маълумотлари орқали карта SMS-хабарномасини ўз телефон рақамига улаб олиб, бошқарувни қўлга киритиб, банк иловаси орқали пулларни ўзлаштирганлиги маълум бўлган.

ИИВ Киберхавфсизлик маркази хабарига кўра, С.Ч.га нисбатан Жиноят Кодексининг 169-моддаси билан жиноят иши қўзғатилиб, тергов ҳаракатлари олиб борилмоқда.