Энг яхши ният

                        Ватан ҳимоячилари шарафига бағишланади

          “Ватан асли остонадан -

Бошланади” дейдилар.

Ватан нима?

У бир қўрғон -

Бошпанадир, дейдилар.

Унинг ҳар бир хизматига

Шай турмоқлик - бурчимиз.

Ҳимояга берилгандир

Билакдаги кучимиз.

Сиз дунёга назар ташланг

Нигоҳлари саволлар.

Бунда қанча ғалаёнлар,

Қанча умри заволлар!

Одамлар бор ҳали бир бор -

Тинчлик таъмин тотмаган.

Гўдагини эркалатиб,

Осойишта ётмаган.

Минг бир хатар-хавотирда

Ўтиб борар кунлари.

Эс таниган боласининг –

Қуролдадир қўллари.

Кўрмоқ эмас, ҳатто хаёл

Қилмоқ қийин бу ҳолни -

Ногаҳонда япроғига

Қон сачраган ниҳолни...

Минг шукурки, бизлар озод,

Турмушимиз фаровон.

Мусаффодир осмонимиз,

Қуёшимиз чароғон.

Бунда ҳар кун тўй-тантана,

Ўйин-кулги, яллалар.

Фарзандларнинг камолидан

Каломланган аллалар.

Тинчлигинг ўз қўлингдадир -

Ҳумо қушдай таранган.

Дунёдаги бор эзгулик -

Инсон учун яралган!

“Олисдаги буғдойлар”дан

Ҳатто ҳовуч тўлолмас.

Огоҳ бўлсак, ҳушёр турсак,

Ғаламислар йўлолмас.

Бизга буткул ёт ғоялар -

Ётлигича қолгайдир.

Зоти улуғ инсон асл -

Зотлигича қолгайдир.

Шу ватаннинг тинчлигини,

Ҳурлигини сақлайлик.

Меҳр  –  фазилатлар ичра –

Дурлигини сақлайлик!

Тол хивичдан той ясаган

Болажонлар бор бўлсин!

Катта бўлсин ва қалбида -

Ватан бўлсин, ор бўлсин!

Дуо қилсин отахонлар,

Алқасин ҳар онажон.

Кўз тегмасин.

Пойдор бўлсин -

Ўзбекистон жонажон!

Ориф ТЎХТАШ.