Ғазода тинчлик сари: Трамп барчани тез ҳаракат қилишга чақирди

АҚШ президенти Дональд Трамп Ғазодаги урушни тўхтатишга қаратилган саъй-ҳаракатларда иштирок этаётган барчани тез ҳаракат қилишга чақирди.

Унинг сўзларига кўра, дам олиш кунлари ҲАМАС ва жаҳоннинг турли мамлакатлари билан ижобий музокаралар бўлиб ўтган.

«Бу музокаралар жуда муваффақиятли ўтди ва жадал суръатда давом этмоқда. Техник гуруҳлар душанба куни Мисрда қайта йиғилиб, охирги тафсилотларни муҳокама қилади. Биринчи босқич шу ҳафта якунланиши керак, шунинг учун барчадан тез ҳаракат қилишни сўрайман», — дейди у Truth Social ижтимоий тармоғида.

Аввалроқ Трамп журналистлар билан суҳбатда, исроиллик гаровдагилар жуда яқин вақтда озод этилади, деб айтган.

Бугун Ғазони вайронага айлантирган икки йиллик можарони тугатиш бўйича Исроил ва ҲАМАС музокаралари кутилмоқда.

Музокараларда асосий воситачи бўлган Миср, ҳар икки томон делегацияларини қабул қилиб, исроиллик гаровдагиларни фаластинлик маҳбусларга алмашиш имкониятларини муҳокама қилишини маълум қилди.

Амстердамда эса Ғазо халқига ҳамдардлик билдириш ва урушни дарҳол тўхтатишни талаб қилиб юз минглаб одамлар кўчаларга чиқишди.