Икки озарбайжонликнинг ўлими Москва ва Боку ўртасидаги дипломатик можарога сабаб бўлди
Россиянинг Екатеринбург шаҳрида озарбайжонлик ака-уканинг ўлими билан боғлиқ дипломатик можаро Москва ва Боку ўртасида бир йил ичида иккинчи марта оммавий тортишувни келтириб чиқарди.
Жума куни Екатеринбургда ҳуқуқ-тартибот идоралари ходимлари 2001, 2010 ва 2011 йиллардаги қотилликларда гумонланувчиларни қўлга олди. Ҳибсга олиш чоғида асли озарбайжонлик бўлган ака-ука Зийиддин ва Гусайн Сафаровлар ҳалок бўлди. Яна бир неча киши касалхонага ётқизилган.
Озарбайжон манбаларининг иддао қилишича, Сафаровлар қўлга олиш чоғида хавфсизлик кучлари томонидан “шафқатсизларча ўлдирилган”. Россия Тергов қўмитаси ака-укалардан бири юрак хуружидан вафот этганини, иккинчисининг ўлими сабабларига ойдинлик киритилаётганини маълум қилди.
Душанба куни Россиянинг «Спутник» агентлигининг Бокудаги офисида федерал хавфсизлик хизматининг икки ходими ҳибсга олинган. Ҳукуматга яқин озарбайжон нашрлари Россия ҳукумати ва шахсан президент Владимир Путинни танқид қилмоқда. Москва Россия ҳуқуқ-тартибот органларининг ҳаракатларига бундай жавобни асоссиз деб ҳисоблайди.
Вазият ўтган йил охирида Россия ҳаво ҳужумидан мудофаа тизими Озарбайжон йўловчи самолётини адашиб уриб тушириб юборган инқирозни эслатади. Йўловчиларнинг ярмидан кўпи ҳалок бўлди, улар орасида уриб туширилган самолётни Қозоғистонга олиб боришга муваффақ бўлган учувчилар ҳам бор.
Озарбайжон президенти Илҳом Алиев Россиядан айбини тан олишни ва чуқур тергов ўтказишни талаб қилган эди. Путин узр сўради, аммо бу етарли эмас эди. Пропаганда уруши бошланди, Боку "Россотрудничество" тузилмаси "Россия уйи"ни жосусликда айблаб, ёпди ва Россия давлат нашри - "Спутник" филиалини ёпишни талаб қилди.
Ҳалок бўлганларнинг акаси, «525-ci qəzet» газетаси бош муҳаррир ўринбосари Сейфеддин Гусейнли Россия хавфсизлик кучлари вакиллари томонидан «шафқатсизларча ўлдирилган» укалари жасадларини тан олиш учун суд-тиббиёт экспертизасига таклиф этилгани танасидаги кўп сонли қийноқ изларини кўриб даҳшатга тушганини айтган.
Ака-ука Зийиддин ва Гусайн Сафаровлар жасадлари бугун Ағжабедига дафн қилиш учун олиб келинган.
