Ингушетиялик етти ёшли қизчанинг мунтазам калтаклангани сабаби аниқланмоқда
Назрандаги шифохоналардан бирига етти ёшли Аиша Ажигова олиб келинди. Қизча шифохонага кўплаб жароҳатлар билан ётқизилди. Маълум бўлишича, аммасининг уйида васийликка ҳужжати бўлмаган ҳолда яшаган. Қариндошлари қизчани мунтазам равишда қийнаб келган. Бу ҳақда ЎзА хабар бермоқда.
Етти ёшли жиянини мунтазам равишда калтаклаб келган ингушетиялик 35 ёшли аёлнинг эри полицияда ишлайди. Бу ҳақда республика ИИВ вояга етмаганлар ишлари бўйича бўлинмаси бошлиғининг ўринбосари Адам Мургустов маълум қилди.
Унинг таъкидлашича, қизча ҳеч нарсага муҳтож эмас эди. Нега қизчанинг онаси ташлаб кетгани, нима учун аммаси мунтазам равишда қийнаб келгани ИИВ томонидан ҳозирча аниқланмади.
Шу билан бирга Мургустовнинг хабар қилишича, икки йил муқаддам қизчанинг оиласи ночор сифатида полиция ҳисобида турган эди.
4 июль куни қизча кўплаб жароҳатлари билан шифохонага олиб келинди. Кейинроқ Ажигова Москвадаги болалар жарроҳлик Илмий тадқиқот институтига олиб борилди. Шифокорлар унинг қовурғалари ва умуртқаси синганини, оёқ-қўлларига жиддий зиён етганини ва қон айланмасида бузилишлар бўлганини аниқлади. Клиника президенти Леонид Рошалнинг хабар қилишича, қизчанинг қўли ампутация қилиниши эҳтимоли бор. Қизчанинг аҳволи оғирлигича қолмоқда.
