Жанговар взводларнинг қайси бири энг илғор бўлади?

Марказий ҳарбий округга қарашли ҳарбий қисмда Мудофаа вазирлиги тизимида ўтказилаётган “Энг илғор жанговар взвод” кўрик-танловининг якуний босқичи бошланди.

Самарқанд горнизонига қарашли ҳарбий қисм тоғ ўқчи батальони 7-тоғ ўқчи взводи шахсий таркиби танловнинг қуйи босқичларида ғолибликни эгаллаб, унинг якуний босқичида иштирок этмоқда.

Мусобақа “Саф кўриги” шарти билан бошланди. Дастлаб ҳарбийларнинг тегишли ҳужжатлари, уларга бириктирилган қурол-аслаҳалар, сафар анжомлари кўздан кечирилди.

Беш кун давом этадиган танловнинг кейинги шартларида иштирокчиларнинг соҳага оид назарий билимлари тест синовлари орқали текширилса, эпчил ва чаққонлиги турникда тортиниш, қисқа ва узоқ масофага югуриш бўйича синовдан ўтказилади. Иштирокчилар қуроллар, жанговар ва зирҳли техникалардан белгиланган нишонларга ўқ отиш каби шартларда ўзларининг мерганликларини кўрсатади.

Тадбирнинг очилиш маросимида Мудофаа вазирлиги, Марказий ҳарбий округ қўшинлари қўмондонлиги вакиллари сўзга чиқиб, иштирокчиларга омад тилади.

Самарқанд шаҳар “Баркамол авлод” болалар мактаби тўгарак аъзолари ҳамда разведка взоди томонидан тайёрланган бадиий ва кўргазмали чиқишлар намойиш этилди.