Қачонгача ёзда иссиқдан, қишда кўмирдан қораямиз?!
Шу кунларда вилоятдаги қайси соҳа вакиллари билан суҳбатлашманг, вақти бироз зиқлиги, юқоридан ишчи гуруҳ келгани ёки келааётганини айтмоқда. Табиийки, юқори идора вакилларининг қуйида олиб борилаётган ишлар билан ростакамига танишиши, камчиликларини ўрганиши шу тизимдаги қатор муаммоларнинг бартараф этилишига хизмат қилади.
Лекин айни қиш кунларида ушбу ишчи гуруҳ вакилларига бир илтимосимиз бор эди. Қайси тизимни олиб қараманг, соғлиқни сақлашми, мактабгача таълим ё мактабми – ҳозир беморларнинг иссиқ палаталарда ва болаларнинг иссиқ синф хоналарида дарс тайёрлаши ҳаммасидан ҳам аҳамиятли. Хўш, газ етиб бормаган хонадонлар-у ижтимоий соҳа муассасалари қандай иситиляпти? Агар мутасаддиларнинг микрофон қаршисида "шунча кўмир тарқатилди, шунча аҳолига арзонлаштирилган кўмир етказиб берилди", деган гапларини кўмир олаётганлар эшитса борми?! Ахир, бугун уларнинг арзидан кўмир ҳам тутаб кетяптику!
- Арзонлаштирилган кўмир бериляпти, деган гапни эшитиб ўғлим билан керакли манзилга бордик, - дейди шундай истеъмолчилардан бири. – Навбатда тургач, кўмир оладиган бўлдим. Қарасам, бир тонна тупроқ жойланган (жуда катта қисми кукун, демоқчи). Ия, деб ҳайратимни яширмадим. “Олмасангиз, ўзингиз биласиз, вақтимизни олманг”, дея қўрс жавоб беришди. Нима бўлса бўлди, дея юкланган харидни олдим, иложим қанча. Ахир бир тонна кўмир учун 300 минг сўм тўлаб қўйдим-да. Менга шунақа кукун кўмир берилганини чиқаётганда, қўшнимнинг киноясидан тушуниб қолдим. Ҳайдовчиларга “доля”сини берсам, тузукроғидан олиб чиқишар экан. Содда бўлмай қолай, кетавердим. Мана, бир ой ўтди, фақат биттагина уйни иситиб (унга қўшимча кўмир сотиб олганман, аралаштириб ишлатиш учун) январни амаллаб ўтказдик. Буёғига бир тоннаси қарийб 2 миллион сўмга бориб қоладиган кўмир оламан кўчадан.
- Уйда икки келиним, ўзимиз чол-кампир, жами ўн киши яшаймиз, - дейди кўмир олганлардан яна бири. – Арзонлаштирилган кўмир олиб, уйимизни иситганимиздан кейин неварачам қаттик касал бўлиб қолди. Аллергик шамоллаш, дейишдими, ишқилиб, нима бўлди, нақд беш миллион пулимиз кетди. Шундан кейин Қозоғистондан келтирилаётган кўмирдан, килосини 1700 сўмдан харид қилдик.
Ҳа, айтганча, ишчи гуруҳ аъзоларидан яна бир илтимосимиз бор, йўлдаги тут дарахтлари каллаклаб кетилмадимикан, шунгаям бир қараб ўтинг.
Масъуллардан ҳам бир илтимосимиз бор: қишда совқотаётган ва касал бўлганлардан пул ишламайлик, шу "бекат"да коррупцияни тўхтатиб турайлик, ахир! Ахир, юзимиз қачонгача ёзда иссиқдан, қишда ярми тупроқ кўмирдан қораяверади?!
Гулруҳ МЎМИНОВА.
