Ростдан ҳам сурияликлар Ўзбекистонга таҳдид соляптими? Нега бундай ёлғон хабарларга ҳуқуқ-тартибот идоралари муносабат билдирмаяпти?
Кейинги пайтларда ижтимоий тармоқлар, айниқса, телеграмм каналидаги айрим гуруҳлар орқали асосланмаган, норасмий ва одамлар орасида ваҳима уйғотувчи хабарларни тарқатиш урфга айланмоқда! Масалан, қуйидаги хабарга эътибор беринг:
«Barcha fuqarolar diqqatiga! Shoshilinch xabar!
Ichki ishlar vazirligi quyidagi bayonotni eʼlon qiladi:
Mamlakatda boʻlib turgan qiyin vaziyatlarni hisobga olib, hurmatli fuqarolarimizga:
- uylaringizda eshiklarni doimiy berkitib yurishingizni, ehtiyotkorlik va hushyorlikni oshirishingizni, har qanday suriyalik immigrant bilan u biror muammosini aytib kelsa ham yaqin munosabatda boʻlmaslikni, begona kishilar bilan liftdan foydalanmaslikni, ahlingizni ogohlantirmay kechasi koʻchaga chiqmaslikni tavsiya qilamiz.
Quyidagi koʻrsatmalarga amal qilishingizni soʻraymiz:
- 3 yoki 4 kishi oʻzlarini suv shirkatidanmiz yoki Escom shirkatidanmiz, uyingizdagi elektr chiroqlarini bepul almashtirib beramiz, deb uyingizga kirmoqchi boʻlishadi. (Ular bu ishlarini bir necha joylarda qilishdi ham). Ularni uyingizga kirita koʻrmang. Ular pul va bola oʻgʻrilaridir! Sizga qurol bilan tahdid ham qilishlari mumkin.
Ogohlantirish:
Bu bayonotni oʻzingizga yaqin boʻlgan insonlarga yuboring. Shu ish bilan kishilar hayotini saqlab qolgan boʻlasiz.
Uyingiz eshiklari mahkam yopilganligiga hamma vaqt ishonch hosil qiling!!!
Xizmatchilar va farzandlaringizga eshikni: "kimsiz, ismingiz nima?", demasdan ochmasliklarini uqtiring!
Muhammad Ibrohim Yusuf,
Ichki ishlar vazirligi».
Бу хабарга мен ишонмадим. Чунки биринчидан, қайсидир телеграмдан олинган ёлғон ахборот тарқатиляпти, маълумотнинг муаллифи ҳам кишида шубҳа уйғотади (вазифаси ёзилмаган). Иккинчидан, улар уйма-уй кириб юришган бўлса, манзилини кўрсатиб ёзишмайдими?
Афсуски, ушбу тўқима, ёлғон ахборотларга ишонадиган, кенг жамоатчилик орасида ваҳима кўтариб, аҳолини саросимага солиб қўядиган ватандошларимиз бор орамизда. Асосланмаган ахборотнинг оқибатини ўйламасдан бир зумда тарқатиб юборадиганлар ҳам кўп. Ҳозирги ахборот асрида бундай ёлғон ахборотларга ишонмаслик ҳам огоҳлик, хушёрлик аслида.
Лекин ички ишлар ва бошқа ҳуқуқни муҳофаза қилиш идоралари бундай ахборотларга муносабат билдириб қўйишса, яхши бўларди. Зеро, ҳар қандай ёлғон ахборотнинг хуружи жамиятга зиён келтириши мумкин.
