Самарқандда илк бор Евроосиё болалар хирурглари конфедерациясининг конгресси ўтказилмоқда
Вилоят тиббиёт соҳасида хорижий ҳамкорлик янаям кенгайиб, халқаро тиббий анжуманлар ўтказилиши анъана тусига кирди.
Шу кунларда Самарқанд яна бир муҳим анжуман - Евроосиё болалар хирурглари конфедерациясининг I конгрессига мезбонлик қилмоқда. Бу галги анжуманнинг ўзига хослиги шундаки, илмий шуъбаларда айтиладиган баъзи янгилик ва натижалар аввал амалиётда кўрсатиб берилди. Хусусан, Самарқанд давлат тиббиёт университети ихтисослашган болалар хирургик клиникасида ўтказилган маҳорат сабоқларида Буюк британиялик бир гуруҳ шифокорлар мураккаб операцияларни амалга оширишда ўз тажрибалари билан ўртоқлашди.
- Бугун дунёда миниинвазив операциялар амалга оширилиши тобора оммалашмоқда, - дейди Буюк Британиянинг Southamton университети профессори Ewan Brownlee. – Хусусан, ўзим фаолият олиб бораётган клиникада менинг мутахассислигим, яъни урология бўйича операциялар юз фоиз лапароскопик усулда амалга оширилади. Бу усул беморларнинг тез соғлом ҳаётга қайтиши, жароҳат олмаслиги, шифохоналарда кўп қолиб кетмаслиги каби қатор қулайликларга эга. Ҳозир ўтказилаётган маҳорат машғулотлари ҳам айнан замонавий технологиялар орқали амалга ошириладиган жарроҳлик амалиётлари билан боғлиқ.
Эртага ўтказилиши кутилаётган “Болалар хирургиясида инновацион технологиялар” мавзуида халқаро илмий-амалий конференция иштирокчилари дунёнинг турли қитъаларидан Самарқандга келишмоқда.
- Конгрессга ташриф буюрган Буюк британиялик таниқли шифокорлар марказимизда миниинвазив хирургия бўйича ўқув курслари ва мураккаб операциялар ўтказиб, соҳадаги янгиликларни баҳам кўришди, - дейди Самарқанд давлат тиббиёт университети ихтисослашган болалар хирургик клиникаси бош шифокори Жамшид Шамсиев. - Илмий анжуманда айтиладиган баъзи янгиликлар клиникада амалий тарзда кўрсатиб берилди. Ушбу йирик анжуманда 30 давлатдан 150 нафар хорижлик меҳмонлар – болалар хирургиясининг таниқли вакиллари, олимлар иштирок этиши кўзда тутилган. Конференция давомида 200 дан ортиқ маъруза тингланиши кутилмоқда.
Эслатиб ўтамиз, Евроосиё болалар хирургияси конфедерацияси қарорига асосан илк Конгресснинг айнан Самарқандда ўтказилиши профессор Азамат Шамсиев таваллудининг 80 йиллиги муносабати билан белгиланган.
