Украина–АҚШ музокаралари янги тинчлик режасига асос бўлди
Женева шаҳрида бўлиб ўтган қатор ёпиқ музокаралардан сўнг Украина ва АҚШ янгиланган тинчлик режаси лойиҳасини тайёрлади.
Оқ уйнинг таъкидлашича, Украина бўйича ҳар қандай келгуси келишув мамлакат суверенитети тўлиқ ҳурмат қилиниши асосида шаклланиши шарт.
Украина расман АҚШга ва Дональд Трампга урушни тўхтатиш ва инсонлар ҳаётини сақлаб қолишга қаратилган саъй-ҳаракатлари учун миннатдорлик билдирди. Томонлар яқин кунларда деталлар устида ишни давом эттириш ва Европа ҳамкорлари билан позицияларни мувофиқлаштиришга келишиб олган.
Манбаларга кўра, Владимир Зеленский шу ҳафта Вашингтонга ташриф буюриб, келажак келишувининг энг нозик томонларини Трамп билан бевосита муҳокама қилиши мумкин. Якуний қарор икки президент ихтиёрида бўлади.
Донбасс ва НАТО - музокараларнинг асосий тўсиқлари
Украина ОАВга кўра, Женевадаги музокараларда икки энг баҳсли масала — Украина Қуролли Кучларининг Донбассдан чиқарилиши ва мамлакатнинг НАТОга кириш йўли — келишувнинг асосий тўхтаган нуқталари бўлган.
Бу мавзулар Зеленский ва Трампнинг шахсий учрашуви чоғида, шу ёки келаси ҳафтада кутилаётган музокараларда ҳал этилиши кутилмоқда.
Шунга қарамай, бошқа йўналишларда силжиш бор: Қуролли Кучлар сони, "Запорожье" АЭСи, асирлар алмашинуви ва маҳкумларни қайтариш бўйича бир қатор келишувларга эришилгани айтилди.
АҚШдан хавфсизлик кафолатлари бўйича янги ҳужжат
Украина нашрлари маълумотига кўра, Вашингтон Киевга хавфсизлик кафолатларини ўз ичига олган алоҳида ҳужжатни тақдим этган. Унда қуйидаги уч асосий банд мавжуд:
- Россия қайта ҳужум бошласа, АҚШ президенти Америка қуролли кучлари ва разведкасини жалб қилиш ҳуқуқига эга бўлади.
- НАТО — Франция, Британия, Германия, Польша ва Финландия билан биргаликда АҚШ билан синхрон ҳаракат қилиш мажбуриятини олади.
- кафолатлар 10 йил муддатга мўлжалланган.
