Ургутда Президент топшириғи билан қурилган кутубхонадан нима мақсадда фойдаланишяпти?
Ўзбекистон Республикаси Президентининг 2018 йил 17-18 март кунлари Самарқанд вилоятига ташрифи чоғида Ургут тумани вакиллари туман марказида замонавий кутубхона ташкил этиш таклифини билдирган эди. Давлатимиз раҳбари ушбу таклифни қўллаб-қувватлаб, бу борада зарур амалий ёрдам кўрсатилишини таъкидлаган эди.
Шундан сўнг Ургут тумани марказидаги истироҳат боғида кутубхона қурилиши ишлари бошланиб кетди. Бир йил давомида бу ерда 3 миллиард 600 миллион сўм маблағ сарфланиб, икки қаватли, барча қулайликларга эга ахборот-ресурс маркази биноси қад ростлади ва 2019 йил май ойида фойдаланишга топширилди.
Аммо, минг афсуски, ушбу бино ҳалигача ўз эгасига – туман ахборот-кутубхона марказига топширилмаган. Туман ахборот-кутубхона маркази ўз биносида тўловсиз (яхшиям тўловсиз) ижарада фаолият кўрсатиб келмоқда.
Бино кутубхонага топширилмагани майли, ахборот-кутубхона маркази бугун сектор ва турли комиссиялар штабига айлантирилган. Бинода ҳозирда туман 1-сектор штаби, ёшлар ишлари бўйича штаб ва ҳатто хотин-қизлар штаби ҳам жойлашган. Бундан олдинроқ иккинчи қаватда туман IT (ахборот-технологиялар) маркази иш бошлаган эди.
Бу кетишда яқин вақтларда туман ахборот-кутубхона маркази ушбу бинодан сиқиб чиқарилади. Ҳа, айнан сиқиб чиқарилади.
Айтганча, бинонинг ертўласида ёшларга тикиш-бичишни ўргатадиган тўгарак очилган.
Ажаб эмас, яна қандайдир тадбир ёки топшириқ бўйича штаб ташкил этишга эҳтиёж туғилса, ҳеч шубҳасиз бу ҳам ургутлик ёшларнинг орзу-ҳаваси учун Ўзбекистон Республикасининг Президенти ташаббуси билан айнан кутубхона учун қурилган бинодан жой олади. Омон бўлсак, бу башоратимиз ўзини оқлайдими, йўқми, кўрамиз. Ахир бу ерда мутолаа учун мўлжалланган, муҳокама ўтказиш ва компьютер хоналарига мослаштирилган хоналар ҳали бор-да.
Бундан ташқари, лойиҳа бўйича 100 минг нусхадан кўпроқ китобни сиғдириш имконияти яратилган бинонинг ертўласида атиги 20 мингдан сал кўпроқ китоб жойлаштирилган, холос. Агар китобларнинг атиги 7 минг нусхаси бадиий адабиёт эканлигини, Ўзбекистонда аҳолиси энг зич ва энг кўп яшайдиган Ургутда бу рақамлар нимани англатишини тушуниб олиш учун киши математик бўлиши шарт эмас.
Ўзбекистон Республикаси Президенти томонидан 2019 йил 7 июнда “Ўзбекистон Республикаси аҳолисига ахборот-кутубхона хизмати кўрсатишни янада такомиллаштириш тўғрисида”ги қарор қабул қилинган.
Мазкур қарорда республикамизнинг барча шаҳар ва туман марказларида ахборот-кутубхона марказларини жойлаштириш ва уларнинг тўлақонли фаолият юритиши учун биноларни белгиланган тартибда ажратиш вазифаси қўйилган.
Бошқача айтганда, бутун мамлакат бўйлаб замонавий кутубхоналар қурилиши ва китобхонликни янада ривожлантиришга интилиш, айниқса ёшлар учун турли китоблар етказиб бериш чоралари кўрилаётган бир пайтда, Президент томонидан Ургутда намунали равишда ташкил этилган кутубхона биносидан нега бошқа мақсадда фойдаланилмоқда?
Буни туман мутасаддилари нима билан изоҳлайди?
