Устозлар турли тилларда шарафланди
Ўқитувчиларнинг жамиятда беқиёс ўрни бор, чунки уларга билим бериш ва келажак авлодни тарбиялашдек муҳим вазифа юкланган. Ўқитувчиларимиз тинимсиз сай-ҳаракатлари ва ёш авлодни тарбиялашда қўшаётган доимий ҳиссаси учун ҳар қанча эътирофга лойиқ.
Самарқанд халқаро технология университетида ташкил этилган тадбир ана шу шарафли ва масъулиятли касб эгаларини эъзозлашга бағишланди.
Тадбир аввалида университет ректори, профессор Юсуф Абдуллаев устоз мураббийларнинг ёш авлодни тарбиялаш йўлидаги самарали меҳнатлари, уларнинг интеллектуал салоҳиятини юксалтириб бораётганини эътироф этди.
Тадбир давомида ўзининг фидойилиги, ёшларга таълим бериб, уларни Ватанга садоқат руҳида тарбиялашдаги улкан ҳиссалари учун университетнинг профессор-ўқитувчиларига эсдалик совғалар топширилди. Тадбирда хорижлик профессор-ўқитувчилар ўз она тилларида байрам табрикларини йўлладилар.
Тадбирга университет катта ўқитувчиси, таниқли хонанда Зулфия Рашидованинг устозларни мадҳ этувчи тароналари ҳамда талабалар томонидан тайёрлаган турли рақслар йиғилганларга хуш кайфият бахш этди.
