Ustozlar turli tillarda sharaflandi

O‘qituvchilarning jamiyatda beqiyos o‘rni bor, chunki ularga bilim berish va kelajak avlodni tarbiyalashdek muhim vazifa yuklangan. O‘qituvchilarimiz tinimsiz say-harakatlari va yosh avlodni tarbiyalashda qo‘shayotgan doimiy hissasi uchun har qancha e’tirofga loyiq.

Samarqand xalqaro texnologiya universitetida tashkil etilgan tadbir ana shu sharafli va mas’uliyatli kasb egalarini e’zozlashga bag‘ishlandi.

Tadbir avvalida universitet rektori, professor Yusuf Abdullayev ustoz murabbiylarning yosh avlodni tarbiyalash yo‘lidagi samarali mehnatlari, ularning intellektual salohiyatini yuksaltirib borayotganini e’tirof etdi.

Tadbir davomida o‘zining fidoyiligi, yoshlarga ta’lim berib, ularni Vatanga sadoqat ruhida tarbiyalashdagi ulkan hissalari uchun universitetning professor-o‘qituvchilariga esdalik sovg‘alar topshirildi. Tadbirda xorijlik professor-o‘qituvchilar o‘z ona tillarida bayram tabriklarini yo‘lladilar.

Tadbirga universitet katta o‘qituvchisi, taniqli xonanda Zulfiya Rashidovaning ustozlarni madh etuvchi taronalari hamda talabalar tomonidan tayyorlagan turli raqslar yig‘ilganlarga xush kayfiyat baxsh etdi.