“SIUT Students Girls Club”: Fan va texnologiya sohasida talaba qizlar uchun yangi imkoniyatlar
Samarqand xalqaro texnologiya universitetida talaba qizlarni ilm-fan va texnologiyalar sohasida rivojlantirishga qaratilgan yangi tashabbus – “SIUT Students Girls Club”(Talaba qizlar klubi) tashkil etildi.
Ushbu klubning asosiy maqsadi – talaba qizlarni kasbiy mahoratini oshirish, ularga muhandislik, tadbirkorlik va ilmiy sohalarda yangi imkoniyatlar yaratish. Klub faoliyatining asosiy yo‘nalishlari orasida innovatsion fikrlash, zamonaviy texnologiyalarni o‘zlashtirish va jamiyatda gender tengligini ta’minlash muhim o‘rin egallaydi.
SIUTda «Talaba qizlar klubi»ning tashkil etilishi tadbirkorlik, muhandislik va boshqa sohalarda talaba qizlar uchun yangi kasbiy ufqlarni ochishga qaratilgan. Mazkur klubning ochilishiga bag‘ishlangan tadbirda «Ishbilarmon ayollar: maqsadlar va yuksak natijalar» mavzusida mahorat darsi tashkil etildi. Unda viloyat hokimining o‘rinbosari – oila va xotin-qizlar boshqarmasi boshlig‘i Zebiniso Rahmonova, "Tadbirkor ayol" xalqaro assotsatsiyasi viloyat bo‘limi rahbari Feruza Xonkeldiyeva ishtirok etdi.
Ular gender tengligini ta’minlovchi tashabbuslar muhimligini ta’kidlab, xususan, «Milliy kadrlar zaxirasi», «Qizlarjon klubi» faoliyati hamda «O‘zbekiston-2030» strategiyasining aynan xotin-qizlarga oid bandlariga alohida to‘xtalib o‘tdi.
- Bugungi kunda kasblar o‘rtasidagi gender chegaralari yo‘qolib bormoqda, - dedi Z.Rahmonova. - Ilgari muhandislik va tadbirkorlik sohalari asosan «erkaklarga xos» deb qaralar edi. Hozirda bu stereotiplar asta-sekinlik bilan yo‘qolib, xotin-qizlarga berilayotgan keng imkoniyatlardan oqilona foydalanib, o‘zlarining kuchli iroda va qat’iyatlari bilan muvaffaqiyatga erishayotgan muhandis, tadbirkor va rahbar opa-singillarimiz yosh avlod uchun haqiqiy o‘rnak bo‘lmoqda.
Tadbirda klub doirasida talaba-qizlar uchun innovatsion fikrlashni rivojlantirish, texnologiyalarni o‘zlashtirish va muvaffaqiyatli karera qurishga qaratilgan mahorat darslari va amaliy anjumanlar tashkil etish rejalashtirilayotgani ma’lum qilindi.
Asila Ibragimova.
