Зеленский Трамп ва Путин билан шартсиз учрашишга тайёр

Украина президенти Владимир Зеленский АҚШ ва Россия президентлари — Дональд Трамп ва Владимир Путин билан “ҳеч қандай шартларсиз” учрашишга тайёр эканини билдирди. Бироқ у Москвада учрашув ўтказишга рози эмаслигини таъкидлади.

Зеленский бу ҳақда Sky News телеканалига берган интервьюсида айтган: «Мен Трамп ва Путин билан икки томонлама ёки уч томонлама форматда учрашишга тайёрман. Ҳеч қандай шарт қўймайман», — деди у.

Зеленский шу билан бирга Москвага бормаслигини яна бир бор қайд этди. Унга кўра, музокаралар бошқа давлатда ўтказилиши мумкин, АҚШ ва Европадан бу борада кўп таклифлар бор.

Шу кунларда Россия армияси Запорожье ва Харьковга зарба беришда давом этмоқда. Ҳужум оқибатида икки киши ҳалок бўлган, 20 га яқин киши яраланган. Харьковдаги Фармацевтика университети биноси вайрон бўлган, Украина темир йўлларига қарашли энергетика подстанцияларига зарар етган.

Трамп маъмурияти НАТО иттифоқчилари ҳисобига Украинага биринчи қурол-яроғ етказиб беришга розилик берди. Бундан ташқари, Украина ва унинг Ғарбий иттифоқчилари жанговар майдонда сунъий интеллект технологияларини фаол ривожлантирмоқда. Вашингтон Киевга сунъий интеллект технологияси билан жиҳозланган ҳужумларни мувофиқлаштириш қобилиятига эга бўлган ўн минглаб ҳарбий дронларни етказиб бериш арафасида. Дронлардан оммавий фойдаланиш замонавий урушнинг янги босқичидан далолат.