Россиянинг Украинага энг кучли зарбаси. Трампнинг “Москвани дўзахга айлантириш” таҳдиди. «Сиз бориб уларни тартибга чақиринг!»

Кейинги пайтларда Россия Украинага тез-тез йирик ҳужумлар уюштира бошлади. Бу сафар Киев осмонини тутун қоплади. 9-10 июль кунлари тунда Украинага энг йирик дрон ва ракета зарбалари берилди. Сўнгги маълумотларга кўра, пойтахтда ҳалок бўлганлар ва 16 нафар жароҳатланганлар бор.

Икки мамлакат май ойида ўт очишни тўхтатган эди. Ўшанда Владимир Путин томонидан Иккинчи жаҳон урушидаги ғалабанинг 80 йиллиги муносабати билан “уч кунлик сулҳ” эълон қилинди. Путин мурожаатида “бу сана учун барча ҳарбий ҳаракатлар тўхтатилиши”ни таъкидлаб, Украинани қўллашга чақирган ва рад этилган тақдирда “оқибатлар” ваъда қилган. Бунга жавобан Владимир Зеленский Россия таклифини “театрлаштирилган спектакль” деб атади ва музокаралар учун ўт очишни камида 30 кунга тўхтатиш кераклигини таъкидлади. Нима бўлганда ҳам икки томон бир-бирини сулҳни бузганликда айблади.

Июнь охири, июль бошида ҳужумлар янги куч билан авж олди. Сўнгги бир соат ичида Украина мониторинг каналлари турли йўналишлардан Киевга ўттизга яқин учувчисиз самолётлар ҳужуми ҳақида хабар берган. Ўнлаб учувчисиз самолётлар бу мамлакатнинг бошқа ҳудудларига ҳужум қилмоқда.

Россия ҳам Украина учувчисиз учоқларининг ҳужумлари ҳақида хабар берди. Шу куни Украина ҳарбийлари ҳам Россияга учувчисиз учоқларни учирди. Россия аэропортларида "вақтинчалик чекловлар" жорий этилди. Йўловчи самолётларни Россияга қўндириш учун айланма ҳаво йўлларидан фойдаланишга тўғри келди.

Лавозимига киришиши биланоқ Россия ва Украинада урушни тўхтатишга ваъда берган Трамп айни пайтда Россияга қарши янги қаттиқ санциялар киритишга тайёр. АҚШ ва Украина расмийларининг келаси ҳафта Рим ва Киевда бўлиб ўтадиган олий даражадаги учрашувларидан сўнг Украинага АҚШ ҳарбий ёрдамининг бир қисмини етказиб бериш қайта тикланиши кутилмоқда. Оқ уйда журналистнинг Украинага Америка қуролларини юборишда пауза қилишни ким буюргани ҳақидаги саволига жавоб берар экан, Трамп шундай жавоб берди: "Билмайман. Балки сиз менга айтарсиз?"

CNN 2024 йилда, ҳатто АҚШ президентлиги сайловларидан олдин, Трампнинг сайловолди кампанияси учун ёпиқ маблағ йиғиш тадбирларидан бирида олинган аудиоёзувларни эълон қилди. Ёзувда Трамп бир пайтлар Путинга Украинага бостириб кирса, “Москвани бомбардимон қиламан” деб таҳдид қилгани айтилади. "Мен Путинга айтдим: "Агар Украинага бостириб кирсанг, мен Москвани жаҳаннамга айлангунча портлатаман. Бошқа иложим йўқ", дейилади ёзувда. Кремль бу маълумотни ўта вазминлик билан изоҳлади: ёзув сохта бўлиши мумкин.

Одамлар ҳаёти тутдек тўкилаётган бир пайтда бундай сафсата…

Шу ўринда бир мисол: 6 яшар неварам шикоят қилиб қолди. «Боғчада иккита бола бор. Боғча опани кўзини шамғалат қилиб, доим жанжал қилишади. Бир-бирига ўйинчоқ отишади. Кейин бу ўйинчоқлар бизга тегади… Сиз уларни бориб тартибга чақиринг, онажон».

Шу пайт буюк давлатлар раҳбарларининг бемаъни, бефойда гаплари ва бир-бирига отаётган «ўйинчоқлари», уларнинг бегуноҳ одамлар, болаларга тегаётгани кўз олдимда келди. Ўхшаш манзара. Фақат бунда бир қарашда беозор кўринган ўйинчоқлар, унда ўт, ўқ, олов. Харьковда 9 ёшли қизалоқ ҳалок бўлди, Запорожьеда 16 ёшли ўспирин… Киевда бутун бошли оила бомбардимон қилинган уй тагида қолиб кетди…деярли ҳар куни ўнлаб одамлар, болалар ҳалок бўлмоқда. Жабрдийда халқ азобда… Катталар эса ҳамон бир-бирига «ўйинчоқ» отиш билан овора. Неварам тили билан айтганда «Сиз бориб уларни тартибга чақиринг!».

Гулнора Холдорова.