Андроид қурилмалар учун Zarnews.uz мобил иловаси. Юклаб олиш x

9 йил олдин содир этилган мудҳиш қотиллик фош этилди

Прокуратура ва ички ишлар органлари томонидан узоқ вақт давомида очилмаган жиноятларни фош этиш юзасидан тизимли чора-тадбирлар амалга ошириб борилмоқда.

Аниқланишича, 24.01.2012 йил 24 январда Қашқадарё вилояти, Косон тумани, “Қорабўйин” маҳалласида яшаган Т.Ғ. ўзига тегишли “Нексия-2” русумли автомашинасида уйидан чиқиб кетиб, бедарак йўқолган.

Т.Ғ. бошқарувидаги автомашина Самарқанд шаҳар, “Маданият” маҳалласидаги кўп қаватли уйнинг орқа томонидан топилган ва ҳолат юзасидан Қарши туман прокуратураси Жиноят кодексининг 97-моддаси 1-қисми билан жиноят иши қўзғатган.

Бедарак йўқолган Ғ.Т.нинг автомашинасини кўздан кечириш давомида, уловнинг турли жойларидан жами 14 дона бармоқ, кафт излари олинган.

Мазкур жиноят иши юзасидан Қашқадарё вилоят прокуратураси томонидан вилоят ИИБ билан ҳамкорликда амалга оширилган кенг қамровли тадбирлар натижасида ўта оғир жиноят фош этилди.

Терговда аниқланишича, М.О., Т.А. ва Д.С. томонидан бедарак йўқолган Ғ.Т. қасддан ўлдирилиб, унинг жасадини Чироқчи тумани, “Шўрбозор” маҳалласи ҳудудида жойлашган захирадаги дала майдонида кўмиб, автомашинасини эса Самарқанд шаҳар, “Маданият” маҳалласи, “Нарпай” кўчасидаги кўп қаватли уйнинг орқа томонига ташлаб кетишганлиги аниқланган.

М.О., Т.А. ва Д.С.ларнинг содир этган жиноятлари уларнинг иқрорлик кўрсатувлари, жиноят содир этилган жойда аниқланган бармоқ излари, кўрсатмаларни ҳодиса содир бўлган жойда текшириш ва юзлаштириш тергов ҳаракатлари ҳамда бошқа далиллар мажмуи билан тўлиқ ўз исботини топган.

Ушбу жиноят иши юзасидан 3 нафар шахсга Жиноят кодексининг 97-моддаси билан айб эълон қилиниб, барчасига "қамоққа олиш" эҳтиёт чораси қўлланилган.