Академик лицейлар учун ҳам тест синовлари стадионларда бўлиб ўтади

13-14 сентябрь кунлари вилоятимиздаги академик лицейларга 2020-2021 ўқув йили учун кириш тест синовлари бўлиб ўтади. Тест синовлари Самарқанд шаҳридаги “Локомотив” ҳамда 2-сон болалар ва ўсмирлар спорт мактаби стадионларида ташкил қилинади.

Абитуриентлар учун мутахассислик бўйича асосий 3 та фандан 15 тадан, жами 45 та тест саволлари тузилган бўлиб, 1 соат 50 минут вақт берилади.

Янги ўқув йили учун Самарқанд давлат чет тиллар институти академик лицейига 703 нафар абитуриент ҳужжат топширган. Уларнинг 390 нафари ўқишга қабул қилинади.

Самарқанд давлат архитектура-қурилиш институти академик лицейига учта йўналиш бўйича 297 нафар абитуриент ўқиш истагини билдирган бўлиб, улардан 208 нафари саралаб олинади.

ТАТУ Самарқанд филиали академик лицейига ҳужжат топширган 375 нафар абитуриентнинг тест синовларида юқори балл тўплаган 260 нафари уч йўналиш бўйича ўқишга қабул қилинади.

Тест саволлари институтларда ташкил этилган эксперт гуруҳлари томонидан тузилган бўлиб, жавоблар варақасини махсус комиссия текширади. Имтиҳон натижалари бир кундан сўнг маълум қилинади.

Хуршида ЭРНАЗАРОВА.