Akademik litseylar uchun ham test sinovlari stadionlarda bo‘lib o‘tadi

13-14 sentyabr kunlari viloyatimizdagi akademik litseylarga 2020-2021 o‘quv yili uchun kirish test sinovlari bo‘lib o‘tadi. Test sinovlari Samarqand shahridagi “Lokomotiv” hamda 2-son bolalar va o‘smirlar sport maktabi stadionlarida tashkil qilinadi.

Abituriyentlar uchun mutaxassislik bo‘yicha asosiy 3 ta fandan 15 tadan, jami 45 ta test savollari tuzilgan bo‘lib, 1 soat 50 minut vaqt beriladi.

Yangi o‘quv yili uchun Samarqand davlat chet tillar instituti akademik litseyiga 703 nafar abituriyent hujjat topshirgan. Ularning 390 nafari o‘qishga qabul qilinadi.

Samarqand davlat arxitektura-qurilish instituti akademik litseyiga uchta yo‘nalish bo‘yicha 297 nafar abituriyent o‘qish istagini bildirgan bo‘lib, ulardan 208 nafari saralab olinadi.

TATU Samarqand filiali akademik litseyiga hujjat topshirgan 375 nafar abituriyentning test sinovlarida yuqori ball to‘plagan 260 nafari uch yo‘nalish bo‘yicha o‘qishga qabul qilinadi.

Test savollari institutlarda tashkil etilgan ekspert guruhlari tomonidan tuzilgan bo‘lib, javoblar varaqasini maxsus komissiya tekshiradi. Imtihon natijalari bir kundan so‘ng ma’lum qilinadi.

Xurshida ERNAZAROVA.