Бўлар экан-ку!
Вақтида турмуш қуришнинг ижобий оқибатлари
Ижтимоий тармоқларда, оммавий ахборот воситаларида “Эрта турмуш қуришнинг салбий оқибатлари”, “Дабдабали тўйлар ортидаги муаммолар” ва бошқа шу каби мавзуларда турли хил мақолалар, видеолавҳалар эълон қилиняпти. Мен эса сал бошқачароқ, вақтида бўлган тўй ва унинг ижобий оқибатлари ҳақида ёзишни мақсад қилдим.
Яқинда ўзим фаолият юритадиган Самарқанд давлат чет тиллар институтининг битирувчиларидан бири, Роза исмли шогирдим турмушга чиқди. Қиз бола - палахмон тоши, дейди-ку! “Палахмондан отилган тош”, яъни вилоятимизнинг олис қишлоғидан чиққан қиз пойтахтга тушди.
У жуда ақлли қиз эди. Институтга киргандан 4-босқичнинг охиригача фақат ўқиди, турли сертификатларни қўлга киритди. Севмади, севилмади. Дугоналарининг “қариқиз бўлиб қолиб кетмасанг бўлгани”, деган ярми ҳазил, ярми чин гапларига ҳам парво қилмади. Уларга аталган жавоби ҳар доим бор эди: “Ҳали кўрасизлар, оқ от минган шаҳзодам мени излаб келади!”
Ўтган ўқув йилининг охирроғида институт дарвозасидан ташқарида бир танишимни кутиб турганимда нотаниш бир кекса аёл яқинлашиб, салом-аликдан кейин мени саволга тутди.
- Домламисиз, синглим?
- Ҳа.
- Тўғрисини айтсам, бир илтимос билан келувдим. Ўзим иштихонликман, ўғлим Тошкентда яшайди. Иккинчи фарзандини уйлантирмоқчи. Шунинг учун эсли хушли, инглизчани яхши биладиган қиз керак-да.
- Куёв бўлмиш ўқиганми? – сўрадим қизиқиб.
- Албатта, халқаро университетни тугатиб, банкда ишлаяпти. Унга ўзим келин топмасам, ҳали-бери уйланадиган нияти йўқ. Тенгдошлари деярли бари уйланиб, фарзандлиям бўлишяпти.
- Тошкентда туғилиб ўсган бўлса қишлоқда катта бўлган қизга уйланармикан неварангиз?
- Албатта, ўзи жуда ақлли бола. Фақат топган келиннинг инглиз тилидан қанақадир сертификати бўлиш керак эмиш. Номини айтишга тилим келмайди. Шуниси бўлса, ақлли, бўйи узунроқ бўлса...
- Онамга ўхшатдим сизни хола, - гапини бўлдим унинг ва биринчи хаёлимга келган келинликка номзод Роза бўлди. – Сиз истаган бир қиз бор. Ўзимнинг шогирдим. Бир кўрасиз, маъқул келса...
- Яхши бўларди, - уям менинг гапимни бўлди. – Ўхшаб қолса тўйида қиммат кўйлак кийдираман сизга!..
Тақдир экан, шогирдим айтганидек, уни излаб келган “оқ от минган шаҳзода” ўша тошкентлик йигит бўлиб чиқди.
Яқинда Роза бир иш билан Самарқандга келган экан. Мен билан ҳам учрашиб кетди. Бахтли эканлиги, жуда яхши оилага келин бўлганлиги, асосийси, ўзи орзу қилгандек магистратурани Тошкентда ўқиши, аҳамиятлиси, Самарқанддагидек бир ижара уйдан бошқасига кўчиб юришдек сарсонгарчиликдамас, ўз уйидан ўқишга қатнаш имконияти борлиги ҳақида тўлқинланиб гапириб берди.
- Бахтингга кўз тегмасин, - дедим мен ҳам хурсанд бўлиб.
- Бувижоним, яъни момоқайнонам сизга салом айтиб юборди.
- Ҳа, тўйингда момоқайнонанг менга кўйлак кийдирмоқчи эди, - дедим кулиб. – Совға у ёқда турсин таклиф ҳам қилинмадим-ку. Бу албатта, ҳазил. Асосийси, бахтли бўлишинг, ота-онанг ва биз устозларингнинг юзини ёруғ қилишинг, ишончимизни оқлашинг керак.
- Ҳа, албатта, ишончингизни оқлайман. Тўғриси, тўйга келадиган бўлсак, Иккала томон ҳам ихчам қилиб ўтказишга келишди. Куёв бўлмиш “ЗАГС”га нечта машина олиб борайлик”, деганда мен “битта етади”, десам ёқа ушлади. Дугоналаримнинг деярли ҳаммаси турмушга чиқиб кетган, қолганлариям қишлоқнинг ақлли қизлари, мен билан бирга “ЗАГС” тадбири учун узоқ йўлга бормайди-ку. Тўйда Тошкентда ўқиётган икки дугонам ва яқин қариндошларим, жами 35 киши қатнашди. Куёв томондан 100 нафардан зиёд киши бўлса, ҳаммаси бўлиб, тахминан 150 киши билан тўйимиз ўтди. Айниқса, Самарқанддан борган ҳар бир қариндошимиз ҳайратини яширолмади. “Бўлар экан-ку, тўйни шунақа ўтказса ҳам”, дейишди. Турмуш ўртоғим ҳам хурсанд. Мен келин бўлиб тушган хонадон аъзолари тўйдан ортган пулни нимага сарфлаш мумкинлигини ҳақида маслаҳатлашаётган пайтда, билиб-билмай гапга қўшилиб қўйдим, яъни қайнота-қайнонамни Туркияга саёҳатга юбориш таклифини ўртага ташладим. Қайнонамнинг кўзига ёш келди. Улар қишлоқдан пойтахтга борганидан бери уч ўғилни катта қилиш, ўқитиш, ҳар бирига квартира сотиб олиш илинжида юравериб, тайинли дам олмаган ҳам экан. Хуллас, улар мени ўз қизларидек қабул қилди. Магистратура босқичида ўқишимни давом эттиришимга беминнат ёрдам беришяпти.
- Қойил, бахтингга кўз тегмасин. Сиздек ақл билан иш юритадиган йигит-қизлар сафи кенгайсин!
Насиба Сиддиқова.
