Бош прокуратура Урганчдаги меҳрибонлик уйи вояга етмаган тарбияланувчиларига жинсий тажовуз қилган икки амалдорга қўлланилган жазони енгил деб ҳисоблашини маълум қилди
Хабарингиз бор, Хоразм вилояти Урганч шаҳридаги 1-оилавий меҳрибонлик уйининг вояга етмаган уч нафар тарбияланувчиси ойлар давомида жинсий алоқага мажбурлаб келингани ҳақдаги хабарлар кенг жамоатчиликни ларзага солди.
Хусусан, жиноятчиларга озодликдан маҳрум этиш билан боғлиқ бўлмаган жазо тайинлангани эътирозларга сабаб бўлди.
Расмий идоралар ҳодиса юзасидан баёнотлар билан чиқмоқда. Жумладан, Бош прокуратура расмий баёнотига кўра, Урганчдаги меҳрибонлик уйининг вояга етмаган тарбияланувчилари билан жинсий алоқада бўлиб келган икки амалдорга қўлланилган жазони енгил деб ҳисоблаб, 29 март куни Олий судга протест киритилган.
