Эртага Самарқандда триатлон ва пара триатлон бўйича жаҳон кубоги мусобақалари бошланади
24-25 май кунлари Самарқандда триатлон ва пара триатлон бўйича “World Triathlon Cup Samarkand-2025”, “World Triathlon Para Cup Samarkand-2025” мусобақалари бўлиб ўтади.
Самарқанд шаҳрида жойлашган "Hilton Regency" меҳмонхонасида халқаро мусобақалар олдидан ташкилотчилар ва машҳур спортчилар иштирокида оммавий ахборот воситалари вакиллари ва кенг жамоатчилик учун матбуот анжумани ўтказилди.
Тадбирда дастлаб нуфузли халқаро мусобақанинг аҳамияти ҳамда мезбон спортчиларнинг турнирга тайёргарлиги, умуман, мусобақа ҳақида батафсил маълумот берилди.
Таъкидланишича, мусобақада бу йил 35 дан ортиқ мамлакатдан, жумладан, Буюк Британия, Германия, Франция, Австралия, Бельгия, Қирғизистон, Қозоғистон, Австрия, АҚШ, Венгрия, Италия ва бошқа кўплаб давлатлар вакилари иштирок этади. Ушбу мусобақа кетма-кет иккинчи йилдирки, Марказий Осиёнинг марказида ўзининг тарихи, маданияти ва меҳмондўстлиги билан машҳур қадимий Самарқанд шаҳрида ўтказилмоқда.
Жаҳон кубоги мусобақалари пара спортчиларнинг баҳси билан соат 7:00 да бошланади. Беллашувлар икки масофада ўтказилади. Жумладан, пара спортчилар учун спринт 750 метрга сузиш, 19 километр велосипед пойгаси ва 5 километрга югуриш. Элит спортчилар учун стандарт 1,5 километр сузиш, 40 километр велосипед ва 10 километр югуриш мусобақалари ўтказилади. Ундан кейин тоифага қараб, бир нечта стартлар режалаштирилган. Элита пойгалари элита аёллар учун соат 11:30 да ва элита эркаклар учун 14:30 да бўлиб ўтади.
Матбуот анжуманида ўтган йил Самарқандда ўтказилган жаҳон кубоги мусобақасида иштирок этган ва юқори натижаларга эришиб келаётган машҳур спортчилар триатлион бўйича Самарқандда ўтказилган жаҳон кубогида 2-ўринни эгаллаган Буюк британиялик Жессика Фуллагар, шу йил Ченгдуда ўтказилган жаҳон кубогида 8-ўринни эгаллаган венгриялик Марта Кропко, ўтган йил Самарқандда ўтказилган жаҳон кубогида 5-ўринни эгаллаган италиялик триатлончи Илариа Зане, Австралиядан Тоби Поверс, триатлон бўйича Осиё кубоги ғолиби Шухан, 2024 йилги ўсмирлар ўртасида жаҳон чемпионати кумуш медали совриндори, Ченгдудаги триатлон бўйича жаҳон кубоги ғолиби, америкалик Риз Ваннерсон журналистлар саволларига жавоб қайтарди.
- Самарқандда иккинчи марта жаҳон кубогида иштирок этяпман, - дейди Буюк британиялик триатлончи Жессика Фуллагар. - Таниш жойда иккинчи марта, бир хил мусобақада қатнашиш спортчи учун энг яхши афзаллик. Албатта, бу имкониятдан фойдаланиб, мусобақада ғолибликни қўлга киритиш учун ҳаракат қиламан.
