Футбол: Иштихонликлар "Чарм тўп-2020" мусобақасининг республика босқичида тўп тепади
Самарқанд шаҳар 2-болалар-ўсмирлар спорт мактаби футбол ўйингоҳида 15-16 ёшли болалар ўртасида маҳаллалараро "Чарм тўп-2020" мусобақасининг вилоят финал босқичи бўлиб ўтди.
Самарқанд вилояти жисмоний тарбия ва спорт бошқармаси ҳамда вилоят футбол ассоциацияси ҳамкорлигида ўтказилган мазкур мусобақа якунида Иштихон туманининг Минглар маҳалласи жамоаси ғолиб бўлиб, Тошкентда бўлиб ўтадиган Республика финал босқичида иштирок этиш йўлланмасини қўлга киритди.
Иккинчи ўринни Пахтачи туманининг Баланд работ маҳалласи жамоаси эгаллаган бўлса, Самарқанд туманининг Оҳалик маҳалласи жамоаси учинчи ўрин билан кифояланди.
"Футболимиз келажаги" мусобақасининг вилоят босқичи ўтказилди
Самарқанд шаҳридаги 1-болалар-ўсмирлар спорт мактабининг футбол ўйингоҳида 9-12 ёшли болалар ўртасида "Футболимиз келажаги" мусобақасининг вилоят босқичи бўлиб ўтди.
Мусобақа натижасига кўра, Пахтачи тумани жамоаси биринчи ўринни эгаллади. Иштихонликлар иккинчи ва Самарқанд шаҳар жамоаси учинчи ўринни қўлга киритди.
“Маҳаллада футбол" мусобақасининг вилоят босқичи ғолиби қўшработликлар бўлди
Самарқанд шаҳридаги 1-болалар-ўсмирлар спорт мактабида бўлиб ўтган 13-14 ёшли болалар ўртасидаги "Маҳаллада футбол" мусобақасида Қўшработ тумани жамоаси ғолиб бўлди. Булунғурликлар иккинчи ва Паст Дарғом тумани жамоаси учинчи ўринни эгаллади.
Аҳрор ШАМСИЕВ.
