Ҳунармандларга қўшимча имтиёзлар берилади
Президентимиз 2023 йил 12 июнда “Аҳолини ҳунармандчиликка жалб қилиш ва ҳунармандчилик фаолиятини ривожлантириш учун қулай шарт-шароитлар яратиш чора-тадбирлари тўғрисида” Фармон қабул қилди. Фармон ижросига кўра, ҳунармандларга бир қатор қўшимча имтиёзлар берилмоқда. Бу ҳақда Ўзбекистон “Ҳунарманд” уюшмаси Самарқанд вилояти бошқармаси бошлиғи Умид Ҳакимов Zarnews.uz’га батафсил маълумот берди.
- Мазкур ҳужжатда “Ҳунарманд” уюшмасининг устувор вазифаси – ҳудудларда ҳунармандчилик фаолиятининг ҳар бир йўналишини алоҳида ёндашувлар асосида ривожлантириш дастурларини амалга ошириш, ҳунармандчиликнинг йўқолиб кетаётган турларини сақлаб қолиш белгиланди, - деди У.Ҳакимов. - Фармон ижросига кўра, 2025 йил 1 январга қадар “Халқ амалий санъати усталарининг миллий каталоги” ва “Туризм соҳасида фаолият юритаётган ҳунармандлар реестри”га киритилган ҳунармандлар учун қатор имтиёзлар берилди. Жумладан:
- календарь йил давомида ҳунармандчилик маҳсулотларини (ишлар, хизматлар) реализация қилишдан тушган тушумнинг 100 миллион сўмдан ошган, бироқ 1 миллиард сўмдан кўп бўлмаган миқдори бўйича айланмадан олинадиган солиқ ставкаси 50 фоизга камайтирилади;
- товар белгиларини миллий рўйхатдан ўтказиш бепул амалга оширилади.
Бундан ташқари, 2023 йилда оилавий тадбиркорликни ривожлантириш дастурлари доирасида касаначилик ва ҳунармандчиликни ривожлантиришга ажратилаётган маблағларнинг камида 70 фоизи ҳунармандчиликни ривожлантириш бўйича лойиҳаларни молиялаштиришга йўналтирилади.
Энг муҳим жиҳатларидан бири - Касаначиликни қўллаб-қувватлаш жамғармаси Ҳунармандчилик ва касаначиликни қўллаб-қувватлаш жамғармаси этиб қайта номланди. Бу эса давлатимиз томонидан ҳунармандларни алоҳида қўллат-қувватланаётганидан даракдир.
Ҳужжатда белгиланишича, 2023 йил 1 июлдан бошлаб:
- ҳунармандчилик маҳсулотларини экспорт қилишда халқаро почта ва курьерлик жўнатмалари сифатида жўнатиш харажатларининг 50 фоизи, бироқ маҳсулот экспорт қийматининг (жўнатиш харажатларисиз) 50 фоизидан ортиқ бўлмаган қисми қоплаб берилади;
- давлат мулки бўлган моддий маданий мероснинг кўчмас мулк объектларини ҳунармандчилик фаолияти билан шуғулланиш, шу жумладан ҳунармандчилик маҳсулотларини реализация қилиш учун фақат Миллий каталог ва Реестрга киритилган ҳунармандларга электрон онлайн-аукцион орқали ижарага берилади.
Яна бир жиҳати. Фармонда 2024 йил 1 мартга қадар “Янги Ўзбекистон” боғига туташ ҳудудда 0,3 гектар ер участкасида намойиш зали, “Уста-шогирд” мактаби ва устахонани ўз ичига олган Ҳунармандлар маскани барпо этилиши режалаштириляпти. Бунда самарқандлик ҳунармандга ҳам 100 квадрат/метргача бўлган жойлар ижарага берилади.
