Жанжал оиланики, ғурбати жамоатникими?
Яқинда таҳририятга бир аёл келди, шикояти бор экан. Гапни "Ҳеч ким менга ёрдам беришни истамайди, ҳамма алдаб жўнатади, мен унақа алдовларга кўнмайман", дея бошлади. Онахонни янаям диққат билан тинглашга киришдик. Қийналаётгани, кўплаб идораларга мурожаат қилгани, аммо ҳаммаси бесамар кетаётганини таъкидлади.
- Маҳалламизга, кўчамизга боринг, уйимнинг аҳволини кўринг, кейин гаплашаман, сиз билан, - деди мурожаатининг асосий сабабини сўраганимда.
- Муддаонгизни айтинг, боришимдан аввал билишим, суриштириб кўришим керак-ку, - дедим.
- Сиз гаплашмоқчи бўлган одамлар сизни алдашади, сиз ўз кўзингиз билан кўринг-да...
Хуллас, у десам, бу дейди, бу десам у.
Охир-оқибат ўғли қамалиб келгани, у билан муносабатлари яхши эмаслиги, уйини иккига бўлиб бериш кераклигини, аҳволи жуда оғир эканлигини айтди.
Табиийки, онахонга аёл сифатида раҳмим келди, ўз ўғлидан шикоят қилишдан оғирроғи бўлмаса керак ҳаётда. Айниқса, она учун. У шикоятини айтишга шунинг учун қийналган экан-да, деган хаёлга бордим. Лекин...
Онахоннинг мурожаатини ўрганиш жараёнида унга маҳалла ҳам, туман ҳокимлиги ҳам бир неча марта моддий кўмак берганлигини билдик. Тўғри, қўлдан берганга қуш тўймас. Энг ёмони (қарангки, бу ҳолатда фарзандларнинг борлиги ҳам ёмон томони бўлиши мумкин экан), у ёлғиз она эмас, фарзандлари вояга етган, аллақачон онага қарайдиган, моддий таъминлайдиган ёшда. Тоғни урса, талқон қиладиган соғлом ўғли, қизлари бор.
Афсуски, бундай мурожаатлар кўп, ака укаларидан, опа сингилларидан, хотин эридан, она боласидан... Бундай мурожаатлар билан ишлаш жуда оғир, айтиш мумкинки, баъзида иложсиз. Чунки аксарияти оиладаги тарбия, унинг ўлчовига бориб тақалаверади. Эҳтимол, уларнинг муаммоси ҳал бўлар, лекин кўнглидаги алам кетмайди. Бир марта оиладаги гап ташқарига чиққани учун юзи қотган оила аъзолари кейинги сафар алам устида, арзимаган гаплар билан идорама-идора юришни бошлайдилар.
Яна такрор айтаман, баъзиларида ҳатто жиддий сабаб бўлмайди, ичида алам бор. Ўша алам уларни “югуртиради”, шикоятларини кўпайтиради. Оилавий келишмовчиликлар ортидан келиб чиқаётган муаммолар негадир хатони ўзимиздан эмас, четдан излашимизга ундайди. Оиладаги муносабатлар, фарзандлар тарбиясида хатоликка йўл қўйгандирман, деб ўйламаймиз. Афсус...
Гулруҳ Мўминова.
