Kollej va texnikumlar imkoniyatidan samarali foydalanish yanada kuchayadi
Prezidentimiz Oliy Majlis va O‘zbekiston xalqiga Murojaatnomasida kirib kelayotgan 2023 yilga “Insonga e’tibor va sifatli ta’lim” yili deb nom berdi.
Darhaqiqat “insonga e’tibor”, “sifatli ta’lim” jumlalari bir-biriga hamohangdir. Zero, sifatli ta’lim bo‘lsa insonga e’tibor oshadi. Insonga e’tibor yaxshilansa, ta’lim sifati ko‘tarishi ta’minlanadi.
Prezident o‘z ma’ruzasida ta’lim sifatini oshirishga, xususan, yoshlarning zamonaviy kasb-hunar egallashi uchun barcha zarur shart-sharoitlarni yaratishga katta e’tibor qaratdi.
Ta’lim sifati bevosita bitiruvchilarning zamonaviy malaka va kasb-hunar ko‘nikmasiga ega bo‘lishi bilan uzviy bog‘liq ekanini ta’kidladi. Bu borada mavjud 700 dan ortiq kasb-hunar maktabi, kollej va texnikumlar imkoniyatidan samarali foydalanish zarurligi ko‘rsatildi. Shuningdek, 2023 yildan boshlab yangi dastur asosida har bir viloyatda bittadan texnikumda Yevropa kasbiy ta’lim standartlari joriy etilishi, kelgusi besh yilda esa barcha kollej va texnikumlar ushbu tizim bilan qamrab olinishi belgilandi. Ayni vaqtda, iqtidorli yoshlarni qo‘llab-quvvatlashni kengaytirish maqsadida kimyo sanoati, elektr texnikasi, transport va energetika sohalarida alohida Muhandislik maktablari tashkil qilinishi va bu orqali yangi zamon injenerlari tayyorlash tizimini yaratish vazifasi qo‘yilgani ulkan ishlarni boshlanishidir.
Chunki zamonaviy injenerlarsiz ishlab chiqarish rivojlanmaydi, zamonaviy standartlarga mos mahsulotlar yaratilmaydi, mamlakat eksport salohiyati ko‘tarilmaydi.
Kasb-hunarga ega bo‘lgan inson hayotda o‘z o‘rnini topadi, avvalo, kam ta’minlangan oilalar farzandlarida tadbirkorlikka, biznesga, pirovard natijada daromad olishga yo‘naltiruvchi bilim, malaka va ko‘nikmalar hamda kompetensiyalar shakllantiriladi.
Bularning barchasi oddiy odamlarga daromad topish uchun yaratilayotgan ulkan imkoniyat. Daromad topish uchun esa, albatta, muayyan kasbni puxta egallash talab etiladi.
Ta’lim sifatini oshirishning asosiy mezoni pedagoglarning kasbiy va pedagogik mahorati hamda ma’naviy yetukligini oshirishga bog‘liq bo‘lganligi sababli ularning kompetentligini oshirish uchun malaka oshirish tizimini takomillashtirish ham muhim ahamiyat kasb etadi.
G‘ayrat Norqulov,
Samarqand viloyati kasbiy ta’limni rivojlantirish va muvofiqlashtirish hududiy boshqarmasi boshlig‘i.
