Миллий “AI Hackathon” Самарқанд ёшларини инновация майдонида бирлаштирди

Самарқандда иккинчи Миллий “AI Hackathon” танлови ташкил этилди.

Ушбу тадбирнинг асосий мақсади тиббий технологиялар, киберхавфсизлик, таълим технологиялари, тадбиркорлик ҳамда интернет тармоғидаги тақиқланган воситалар айланишини назорат қилиш соҳаларида рақамли ислоҳотларни жадаллаштиришдан иборат.

Лойиҳа соҳа мутахассислари ҳамда ахборот технологиялари йўналишида фаолият юритаётган иқтидорли ёшларни бир майдонга жамлаб, долзарб муаммолар учун замонавий ва инновацион ечимлар ишлаб чиқишга қаратилган.

Тўрт кун давом этган танловда иштирок этиш учун 370 нафардан ортиқ ёшлар рўйхатдан ўтган бўлиб, уларнинг 68 нафарини қизлар ташкил этади. Қатнашчилар асосида жами 49 та жамоа шакллантирилди.

Миллий “AI Hackathon” тадбирида республика миқёсидаги 7 нафар юқори тоифали ҳакам, 6 нафар малакали эксперт, 5 нафар спикер ҳамда 23 нафар тажрибали менторлар иштирок этди. Улар иштирокчиларга амалий маслаҳатлар бериб, лойиҳаларни такомиллаштиришда кўмаклашди.

Дастлабки босқичда 13 жамоа саралаб олинган бўлса, кейинги босқичда ҳакамлар ҳайъати томонидан энг яхши 5 та лойиҳа танлаб олинди. Ҳар бир йўналишдан биттадан ғолиб жамоа аниқланиб, улар MacBook ноутбуклари ва бошқа қимматбаҳо совғалар билан тақдирланди.

Танловда Самарқанд “Стартап офиси” жамоаси – “AI club” таълим йўналишида 1-ўринни эгаллади.