Паст Дарғомда иккита уйда ёнғин содир бўлди
Бугун, 11 август куни соат 10:32 да Паст Дарғом тумани “Мирзотўп” маҳалласи, П.Худойбердиев кўчасида ёнғин бўлаётганлиги тўғрисида туман фавқулодда вазиятлар бўлимига хабар келиб тушган.
Шунга кўра, 3 та ёнғин-қутқарув экипажи 6 дақиқада воқеа жойига етиб бориб, соат 11:03 да ёнғин ўраб олинган ва соат 11:34 да ёнғин ўчирилган.
Ёнғин оқибатида бир бирига туташ қурилган уйларда биринчисининг 150 квадрат метр ҳамда қўшни уйнинг 10 квадрат метр майдонида том қисми ёниб зарарланган.
Ҳодиса оқибатида ҳалок бўлган ва жабрланганлар йўқ.
Ҳозирда ёнғин сабаби ва моддий зарар миқдори аниқланмоқда.
Юқоридаги каби кўнгилсиз вазиятларнинг олдини олиш мақсадида, Фавқулодда вазиятлар вазирлиги фуқаролардан ёнғин хавфсизлиги қоидаларига риоя этишни сўраб колади.
