Пенсия жамғармаси фуқароларга мурожаат қилди
Ўзбекистон Республикаси Гидрометеорология хизмати марказининг маълумотига асосан, республика бўйича аномал совуқ об-ҳаво давом этади. Шу сабабли, Пенсия жамғармаси ёши улуғ ва кекса ёшдаги фуқароларни аномал совуқ об-ҳаво шароитида уйда қолишларини сўрайди.
Об-ҳаво шароитлари яхшилангандан сўнг пенсия тайинлаш учун мурожаат қилиш мумкин. Бунда, кечроқ мурожаат қилиш Сизнинг пенсияга бўлган ҳуқуқингизга таъсир қилмайди, яъни пенсиялар пенсия ёшига етган санадан тайинлаб берилади.
"Бола туғилганда бериладиган бир марталик суюнчи нафақаси ва фуқароннинг вафоти муносабати билан бериладиган дафн нафақаси тайинлаш учун Пенсия жамғармасига мурожаат қилмасдан, Халқ банкининг исталган филиалига бориб, нафақа пули олишингиз мумкинлигини эслатиб ўтамиз.
Кам таъминланган оилаларга болалар нафақаси ва моддий ёрдам тайинлангани ёки рад этилганлиги сабаблари тўғрисида фуқароларнинг телефон рақамларига СМС хабарлари юборилди. Шунингдек, фуқаролар нафақаларни рад этилиши сабаблари тўғрисида батафсил маълумотлар олишлари учун маълумотлар маҳалла фуқаролар йиғинларига етказилди. Бунда, фуқаролар бу маълумотларни Пенсия жамғармасига келмасдан, маҳалла фуқаролар йиғинларига ёки Пенсия жамғармасининг 11-40 “Ишонч телефонига” мурожаат қилиш орқали олишлари мумкин.
