Pensiya jamg‘armasi fuqarolarga murojaat qildi
O‘zbekiston Respublikasi Gidrometeorologiya xizmati markazining ma’lumotiga asosan, respublika bo‘yicha anomal sovuq ob-havo davom etadi. Shu sababli, Pensiya jamg‘armasi yoshi ulug‘ va keksa yoshdagi fuqarolarni anomal sovuq ob-havo sharoitida uyda qolishlarini so‘raydi.
Ob-havo sharoitlari yaxshilangandan so‘ng pensiya tayinlash uchun murojaat qilish mumkin. Bunda, kechroq murojaat qilish Sizning pensiyaga bo‘lgan huquqingizga ta’sir qilmaydi, ya’ni pensiyalar pensiya yoshiga yetgan sanadan tayinlab beriladi.
"Bola tug‘ilganda beriladigan bir martalik suyunchi nafaqasi va fuqaronning vafoti munosabati bilan beriladigan dafn nafaqasi tayinlash uchun Pensiya jamg‘armasiga murojaat qilmasdan, Xalq bankining istalgan filialiga borib, nafaqa puli olishingiz mumkinligini eslatib o‘tamiz.
Kam ta’minlangan oilalarga bolalar nafaqasi va moddiy yordam tayinlangani yoki rad etilganligi sabablari to‘g‘risida fuqarolarning telefon raqamlariga SMS xabarlari yuborildi. Shuningdek, fuqarolar nafaqalarni rad etilishi sabablari to‘g‘risida batafsil ma’lumotlar olishlari uchun ma’lumotlar mahalla fuqarolar yig‘inlariga yetkazildi. Bunda, fuqarolar bu ma’lumotlarni Pensiya jamg‘armasiga kelmasdan, mahalla fuqarolar yig‘inlariga yoki Pensiya jamg‘armasining 11-40 “Ishonch telefoniga” murojaat qilish orqali olishlari mumkin.
