Россия амфибия-самолёти Туркияда ёнғинларни ўчириш вақтида ҳалокатга учради

Кеча, 14 август куни Туркия жануби-шарқидаги ёнғинларни ўчириш пайтида Россия ҳарбий-денгиз кучлари авиациясининг "Бе-200ЧС" амфибия-самолёти ҳалокатга учради. Самолёт бортида экипажга ёнғин ўчоқларини кўрсатаётган уч турк фуқароси ва беш нафар рус ҳарбий бўлган. Уларнинг барчаси ҳалок бўлган.

Самолёт сув тўлдириш учун тушган, аммо кейин баландликка кўтарила олмаган ва Каҳраманмараш шаҳри яқинидаги қояга урилган. Бу Туркия Россиядан ижарага олган учта "Бе-200" самолётларидан бири эди. Лизинг шартларига кўра, улар рус экипажи томонидан бошқарилиши керак.

Самолётда қандай техник носозликлар бўлгани ҳозирча номаълум. Россиянинг Анқарадаги дипломатик ваколатхонаси ходимлари ҳалокат жойига етиб келишди ва Россиядан ҳарбий маҳкама комиссияси юборилди.