Самарқандда 34 нафар солиқчи вазифасига нолойиқ, деб топилган

Вилоятда ўтган йили Давлат солиқ қўмитасининг тегишли буйруғига асосан қўмита номенклатурасидаги ходимлар аттестациядан ўтказилган.

Вилоят солиқ бошқармаси ахборот хизматининг маълум қилишича, аттестацияда 783 нафар ходим иштирок этган. Якуний натижаларга кўра, 542 нафар ходим аттестациядан ўтган. Шунингдек, 207 нафари шартли равишда ўтказилган.

Икки босқич аттестация жараёнларида 34 нафар ходим вазифасига нолойиқ, деб топилган.

Шунга мувофиқ айрим ходимларнинг лавозими пасайтирилиб, айримлари эгаллаб турган вазифасидан озод этилган.

Эслатиб ўтамиз, бу ҳақда 4 январь куни янги таҳрирдаги Солиқ кодексининг мазмун-моҳияти бўйича ўтказилган матбуот анжуманида Давлат солиқ қўмитаси раиси ўринбосари Мубин Мирзаев ҳам тўхталиб ўтганди. У ўтган йили Самарқанд вилоятида тадбиркорлардан пул талаб қилган ходимлар прокуратурага берилганини ҳам қайд этганди.

“Тўғри, коррупцияга тўлиқ барҳам берилгани йўқ. Коррупция бор экан, тизимдаги ишларни жойига қўя олмаймиз. Унга қарши курашиш бизнинг биринчи навбатдаги вазифамиз. Бу муаммони бир йилда йўқотишнинг имкони бўлмаслиги мумкин. Аммо уч йилда тўлиқ солиқ тизимини давлатга, корхона-ташкилотларга замонавий хизмат кўрсатадиган органга айлантирмоқчимиз. Бу йилда тадбиркорларни текшириш бўйича мораторий тугаганига қарамасдан, жараён қайтадан бошланмайди”, деган М.Мирзаев.