Самарқандда фарзанди билан кўришолмаётган отага суд орқали дийдор тартиби белгиланди

Расул Руҳшона билан никоҳи ўрталаридаги келишмовчилик сабаб, суд қарори орқали бекор қилингач, фарзанди - Роҳила учун алиментни ўз вақтида тўлаб келган. Бироқ собиқ турмуш ўртоғи ва унинг онаси турли баҳоналар билан қизини кўрсатмай қўяди.

Биринчи синфда ўқиб, мактабнинг билимли ўқувчиларидан бўлган боласи билан учрашишга қилган ҳаракатлари собиқ турмуш ўртоғи ва қайнонасининг қаршилигига учрагач, Расул Роҳила билан қонуний кўришиш чораларини кўрган. У доимий яшаш уй-жойи борлиги, бошқа оила қурганлиги, иш жойи ва яшаш жойидан ижобий таърифлангани, фарзандини соғинганлигини, унинг тарбиясида иштирок этишини кўрсатиб, суддан фарзанди билан кўришиб туришга қарор чиқаришни сўраган.

Суд Расулнинг фарзанди билан кўришиш, унинг тарбиясида иштирок этиш ҳамда тарбиялаш масаласини ҳал этишда қатнашиши лозимлигини инобатга олиб, Роҳила билан ҳар ойнинг биринчи ва тўртинчи шанба кунлари соат 11:00 дан 17:00 га қадар кўришиши ва тарбиясида иштирок этиши тартибини белгилади. Шунингдек, Руҳшонанинг зиммасига Расулнинг суд қарорида белгиланган муҳлатда фарзанди билан кўришишига тўсқинлик қилмаслик мажбуриятини юклади.

Шу ўринда таъкидлаш жоизки, жорий йилнинг 11 ойи давомида фуқаролик ишлари бўйича вилоят судлари томонидан бола билан учрашиш ҳақида даъво аризалар юзасидан 210 та ҳал қилув қарори чиқарилган. Шундан 208 та даъво аризалар қаноатлантирилган, 2 та даъво рад қилинган.

Айтиш мумкинки, 65 та даъво аризалар сайёр суд мажлисларида муҳокама қилинган ва кўриб тамомланган.

Г.ЭСАНОВА,

фуқаролик ишлари бўйича вилоят суди судьяси.