Стол тенниси бўйича Ўзбекистон кубоги ғолиблари аниқланди
Самарқанддаги спортнинг ўйин турлари ва енгил атлетикага ихтисослашган спорт мактабида стол тенниси бўйича эркаклар ва аёллар ўртасида Ўзбекистон кубоги баҳслари ўтказилди.
Ўзбекситон Республикаси спорт вазирлиги, Солиқ қўмитаси, Ўзбекистон стол тенниси федерацияси ҳамкорлигида ўтказилган мусобақада Қорақалпоғистон Республикаси, Тошкент шаҳри ва вилоятлардан 24 жамоада 220 нафар иштирокчи беллашди.
Мусобақада эркаклар ўртасидаги баҳснинг финал босқичида Тошкент вилояти жамоаси вилоятимиз жамоасидан устун келиб, Ўзбекистон кубогини қўлга киритди. Кейинги ўринлар Бухоро ва Тошкент-2 жамоаларига насиб этди.
Хотин-қизлар ўртасидаги финал баҳсида ҳам Тошкент вилояти жамоаси Андижон вилояти спортчиларини 3:0 ҳисобида енгиб, кубокни қўлга киритди. Хоразм ҳамда Тошкент-1 жамоалари шоҳсупанинг учинчи поғонасидан жой олди.
