Толибонлар Қобул яқинидаги қизлар мактабини ёқиб юборди
“Толибон” экстремистик ҳаракати жангарилари Қобул яқинидаги қизлар ўрта мактабини ёқиб юборди. Таълим муассасаси Афғонистон пойтахтидан 25 км узоқликда жойлашган.
Бу ҳақида ToloNews телеканали мамлакат Ички Ишлар Вазирлигининг расмий вакили Нусрат Рахими берган маълумотга таяниб хабар берди. Толибонлар Насири қишлоғида жойлашган мактаб биносига 20 август, сешанба куни соат 01:30 ларга яқин вақтда ўт қуйишган. Етказилган зарар оқибатида 22 та синф хоналари шикастланган, 1500 донадан кам бўлмаган мактаб дарсликлари ёниб кетган.
Ўрта мактабда атрофдаги қишлоқлардан 700 га яқин қизлар ўқишарди. “Толибон” вакиллари бўлиб ўтган ҳодисага алоқалари йўқлигини маълум қилишган.
